Bakıda meditasiya və daxili harmoniya mövzusunda görüş: Sri-Sri Ravi Şankarın mesajları
Bakı, 11 iyun, AZƏRTAC
İyunun 10-da Bakı Konqres Mərkəzində müasir dövrün tanınmış ruhani liderlərindən biri olan Sri-Sri Ravi Şankar ilə görüş keçirilib.
Görüş onun 70 illik yubileyi və təsis etdiyi “Art of Living” təşkilatının 45 illiyi münasibətilə təşkil olunan dünya turu çərçivəsində baş tutub.
Ustadın Bakıya səfəri Azərbaycanda özünüinkişaf sahəsində keçirilən ən iri tədbirlərdən biri hesab olunan “Nine Senses Fest-2026” çərçivəsində reallaşıb.
AZƏRTAC xəbər verir ki, görüş zamanı yoqa və meditasiya təcrübələri, zehni və fiziki rifahın qorunması, stressin idarə olunması və daxili balansın əldə edilməsi kimi mövzular ətrafında fikir mübadiləsi aparılıb.
Ruhani lider insanların bir-birinə təkcə sözlə deyil, həm də öz mövcudluğu və daxili vəziyyəti ilə təsir göstərdiyini bildirib. Onun sözlərinə görə, insanlar hiss və emosiyalarını ətrafdakılara ötürür, bu səbəbdən də müsbət enerji və daxili harmoniya böyük əhəmiyyət daşıyır.
“Biz bəzi insanlardan müsbət, bəzilərindən isə neqativ enerji alırıq. Əksər hallarda nə ailədə, nə də məktəbdə bizə daxili enerjimizi necə müsbət istiqamətləndirməyi öyrətmirlər. Buna görə də insanlar çox vaxt qəmgin və gərgin ruh halından çıxmaqda çətinlik çəkirlər. Yoqa insanı öz mahiyyətinə qaytaran, onu bütün bəşəriyyətlə əlaqələndirən bir vasitədir. O, şüurumuzun imkanlarını araşdırmağa kömək edir. Çox zaman beynimizdə baş verən proseslərin fərqində olmuruq. Lakin indiki ana fokuslandıqda emosiyalarımızı daha düzgün idarə edə bilirik.
Şiddətdən uzaq cəmiyyət, sağlam bədən, iti zəka, aydın düşüncə, travmalardan azad yaddaş və qayğılardan uzaq ruh – hər bir insan buna layiqdir. Beynimiz daim yenilik axtardığı halda, qəlbimiz köklərə və qədim dəyərlərə üz tutur. Buna görə də həyatımızda köhnə ilə yeninin harmoniyasını qorumaq vacibdir. Hamımız birlikdə çalışsaq, qısa zamanda daha xoşbəxt və sağlam cəmiyyət qura bilərik”, - deyə Sri-Sri Ravi Şankar vurğulayıb.
O, çıxışında dünyada davam edən müharibə və münaqişələrə də toxunaraq, Azərbaycanın sülhsevər ölkə olduğunu qeyd edib. Bildirib ki, insanların gündəlik həyatlarında meditasiya ilə məşğul olması və müsbət düşüncələri yayması qlobal sülhün möhkəmlənməsinə töhfə verə bilər.
Daha sonra iştirakçılar üçün 30 dəqiqəlik meditasiya sessiyası keçirilib.
Sessiyadan sonra çıxış edən Hindistanın Azərbaycandakı səfiri Abhay Kumar bugünkü görüşün iştirakçılar üçün faydalı olacağına və onlara müsbət enerji verəcəyinə inandığını bildirib.
“Nine Senses” mərkəzinin akademik direktoru Natalya Jukova və festivalın koordinatoru Nəzrin İsmayılzadə çıxış edərək “Nine Senses Fest-2026” haqqında ətraflı məlumat veriblər. Onlar festivalın iştirakçıların şəxsi inkişafına töhfə verəcəyini, yeni imkanlar yaradacağını və insanlar arasında qarşılıqlı anlaşma mühitinin formalaşmasına xidmət edəcəyini vurğulayıblar.
“Festival iştirakçılar arasında güclü birlik və həmrəylik mühiti yaradacaq”, - deyə çıxışçılar qeyd ediblər.
Bölmənin digər xəbərləri
