Xırdalan, 13 fevral (AZƏRTAC). Xırdalan mədəniyyət sarayında Abşeron Rayon İcra Hakimiyyəti başçısı yanında Şuranın geniş iclası olmuşdur.

Tədbir başlanmazdan əvvəl rayonun, bələdiyyənin, hüquq mühafizə orqanlarının, müəssisə, idarə və təşkilatların, özəl sektorun rəhbərləri, ictimaiyyət nümayəndələri ümummilli lider Heydər Əliyevin abidəsini ziyarət etmiş, abidə önünə çiçək qoymuşlar.

Sonra iclas iştirakçıları mədəniyyət sarayının foyesində təşkil edilmiş, dövlət və özəl sektora aid 40-dan artıq müəssisədə istehsal edilən məhsulların sərgisi ilə tanış olmuşlar. Buradakı stendlərdə təsvir edilən diaqramlar vasitəsilə rayonda kənd təsərrüfatının inkişaf dinamikası göstərilmişdir.

Abşeron Rayon İcra Hakimiyyətinin başçısı Zakir Fərəcov hesabat məruzəsi ilə çıxış etmişdir. Natiq dövlətimizin başçısı İlham Əliyevin bu il yanvarın 18-də Nazirlər Kabinetinin iclasında söylədiyi nitqə istinadla vurğulamışdır ki, qlobal maliyyə böhranı ilə əlaqədar problemlərə baxmayaraq, ölkəmizdə inkişaf davam etmişdir. Keçən ilin yekunlarına görə ÜDM artımı 9,3 faiz olmuşdur. Bunun 8,6 faizi sənaye sektorunun payına düşür. Ölkə iqtisadiyyatına qoyulmuş sərmayələrin ümumi məbləği 9,2 milyard ABŞ dolları, o cümlədən daxili kapital qoyuluşlarının məbləği 7,3 milyard ABŞ dolları olmuşdur. Ölkənin valyuta ehtiyatları artmış, yoxsulluq səviyyəsi azalmışdır.

Z.Fərəcov rayon iqtisadiyyatının bütün sahələrinin və qurumların fəaliyyətini ətraflı təhlil etmişdir. Keçən il 85,6 milyon manatlıq sənaye məhsulu istehsal edildiyini bildirən natiq daha sonra konkret misallar üzərində rayon icra hakimiyyəti tərəfindən keçən il həyata keçirilmiş genişmiqyaslı iş və regionun hərtərəfli inkişafı barədə məlumat vermişdir.

Qeyd edilmişdir ki, həyata keçirilən tədbirlər sayəsində Xırdalanın və bütün rayonun siması nəzərəçarpacaq dərəcədə dəyişmişdir. Küçələr və yollar abadlaşdırılır. Hesabat dövründə 146,7 min kvadratmetr sahəyə asfalt döşənmişdir. Parklar və bağçalar daha da gözəlləşmişdir. Yeni musiqili fəvvarələr qurulmuşdur. Ümumiyyətlə, inşaat işlərinə 288,3 milyon manat xərclənmişdir.

Şəhid ailələri və Qarabağ müharibəsi əlilləri üçün 9 mərtəbəli ev istifadəyə verilmiş, 225 fərdi ev tikilmişdir. Çoxmərtəbəli yaşayış binalarının tikintisi intensiv sürətlə davam edir. 93 mindən çox ağac və dekorativ kol tingi əkilmişdir.

Kənd təsərrüfatında və heyvandarlıq sahəsində də müsbət dinamika müşahidə olunur. Belə ki, keçən il 684 ton taxıl, 1.137 ton bostan məhsulları, 4.936 ton tərəvəz, 1.520 ton meyvə yetişdirilmişdir. Mal-qaranın baş sayı xeyli artmışdır.

Natiq kommunal xidmətlərin həcminin artırılması, təhsil, səhiyyə, mədəniyyət və idman müəssisələrinin maddi-texniki bazasının möhkəmləndirilməsi sahəsində görülmüş işlər üzərində də ətraflı dayanmışdır.

Dostluq əlaqələrinin genişləndirilməsi çərçivəsində Qalubiyyədə (Misir) Azərbaycanın birinci xanımı, YUNESKO-nun və İSESKO-nun xoşməramlı səfiri Mehriban xanım Əliyevanın adını daşıyan məktəb tikilmiş, Bursada isə (Türkiyə) ümummilli lider Heydər Əliyevin büstü qoyulmuşdur.

Məruzədə rayonun qəsəbə və kəndlərinin abadlaşdırılması işlərinə xüsusi yer ayrılmışdır. Keçən il 2.015 ailəyə (8.694 nəfər) ünvanlı sosial yardım verilmişdir. Aztəminatlı ailələrə maddi kömək məqsədi ilə icra hakimiyyətinin inkişaf fondundan 89,5 min manat vəsait ayrılmışdır. Rayon üzrə məşğul əhalinin ümumi sayı 24.464 nəfərdir. Onlardan 12.077 nəfəri dövlət sektorunda çalışır. Orta əmək haqqı ayda 249,3 manat olmuşdur. Keçən il 1.151 yeni iş yeri yaradılmışdır.

Rayon təşkilatlarının və qurumlarının rəhbərləri Şuranın iclasında çıxış etmiş, bir sıra məsələlər barəsində öz fikirlərini söyləmiş və hesabat dövründə rayonda görülmüş işləri qənaətbəxş hesab etmişlər.

Şuranın iclasında Respublika Prezidenti Administrasiyasının regional idarəetmə və yerli özünüidarə orqanları ilə iş üzrə şöbəsinin məsul əməkdaşı İlham Əliyev çıxış etmişdir. O vurğulamışdır ki, Azərbaycan dinamik inkişaf edir. Ölkənin regionları da inkişaf edir. Qazanılmış uğurlar xalqın maddi rifahında adekvat əksini tapır. Ölkənin uğurlarına hər kəs töhfə verir. Abşeron rayonu da bu baxımdan istisna deyil. Son illərdə burada böyük abadlıq işləri görülmüş, infrastruktur yaxşılaşdırılmış, sahibkarlıq inkişaf etmişdir. Bütün bunlar dövlətimizin başçısı İlham Əliyevin uğurlu fəaliyyətinin, əsası ümummilli lider Heydər Əliyev tərəfindən qoyulmuş respublikanın inkişaf strategiyasına dönmədən əməl edilməsinin nəticəsidir.

Sonda iclas iştirakçıları Azərbaycan Prezidenti İlham Əliyevə müraciət qəbul etmişlər.

######