Açıq şəkildə satılan turşular hansı hallarda təhlükəli ola bilər? REPORTAJ
Gəncə, 2 oktyabr, Elcan Məmmədov, AZƏRTAC
Havaların soyuması ilə bazarlarda, piştaxtalarda ev şəraitində hazırlanan və açıq şəkildə satılan turşulara tez-tez rast gəlirik. Alıcılar tərəfindən belə turşulara tələbat çox olsa da, satıcıların bəziləri tələb olunan gigiyenik standartlara əməl etmirlər. Bu da bir çox xəstəlik və infeksiyaların yayılmasına səbəb ola bilir.
AZƏRTAC-ın bölgə müxbiri Gəncə bazarında açıq şəkildə turşu satışı ilə məşğul olan satıcı və alıcılarla söhbət edib, mütəxəssislərin məsələyə münasibətini öyrənib.
Alıcıların bir çoxu onları gözləyən təhlükədən xəbərsizdir. Satılan məhsulun görünüşü alıcıları aldadır.
“Turşu alarkən, ilk növbədə, təmizliyinə üstünlük veririk. Sonra dadına baxırıq, qane edirsə, alırıq. Köhnə, yaxud təzə olmasını daddıqdan sonra ayırd etmək olur. Bir də ki, bazarda tanıdığımız adamlardan alış-veriş edirik, tanımadığımız şəxslərdən turşu almırıq. Qiyməti də münasibdir, bizi qane edir,”- deyə şəhər sakini Elşad Bədəlov deyib.
Şəhər sakini Gülüş Məmmədova isə satılan məhsulların xarici görkəminin onun keyfiyyətindən xəbər verdiyini bildirir: “Güvəndiyimiz şəxslərdən turşu alırıq. Əsasən məhsulun görünüşünə baxıb keyfiyyətli olub-olmaması barədə qərar veririk”.
Müxtəlif meyvə və tərəvəzlərdən hazırlanan turşuların satış qiyməti 1.50 manatdan başlayır. Satıcılar deyirlər ki, açıq satılan kələm turşusunun ərsəyə gəlməsi üçün təxminən bir ay vaxt lazımdır. Bir çox satıcıdan fərqli olaraq bəziləri mümkün gigiyenik qaydalara riayət etməyə çalışır. Təbii ki, belə satıcıların məhsuluna tələbat da çox olur.
“30 ildir turşu satışı ilə məşğulam. Açıq formada satılan turşuların kilosu 1.50-2 manat arasında dəyişir. Müxtəlif xəstəliklərə yoluxmanın qarşısını almaq üçün mütləq şəkildə sanitariya qaydalarına əməl edirik. Turşu çeşidləyərkən əlcəkdən istifadə edirik. Saxlanması zamanı sanitar qaydalara fikir veririk,” - deyə satıcı Mahir Yusubov deyir.
Dövlət Aqrar Universitetinin Bağçılıq kafedrasının dosenti Hüseyn İdrisov isə bildirib ki, tərəvəzin uzun müddət keyfiyyətini itirmədən saxlanması üçün onun becərilmə texnologiyasını düzgün yerinə yetirmək lazımdır. Mütəxəssis diqqətə çatdırıb ki, tərəvəzdən zəhərlənmə halları təkcə gigiyenik qaydalara riayət etmədikdə baş vermir, zəhərlənmə həm də məhsulun becərilməsi zamanı artıq nitratlardan istifadə olunduğu halda baş verə bilir. Onun sözlərinə görə, belə halların qarşısını almaq üçün sertifikatlaşdırılmış məhsullardan istifadə etmək lazımdır.
Məsələyə münasibət bildirən Qida Təhlükəsizliyi Agentliyinin mətbuat katibi İlkin Kərimov isə Agentlik tərəfindən qida zəncirinin bütün mərhələlərində nəzarət tədbirlərinin davam etdirildiyini bildirib: “Planlı, eyni zamanda vətəndaşlardan daxil olan şikayətlər əsasında yoxlamalar həyata keçirilir. Bəzən saxlama şərtlərinə və normativ tələblərə cavab verməyən şəraitdə qida məhsullarının satışı həyata keçirilir. Bu da qida təhlükəsizliyi baxımından yol verilməzdir. Vətəndaşlardan xahiş edirik ki, açıq formada satışı həyata keçirilən məhsulları alarkən mənşə sənədi tələb etsinlər, etiket məlumatlarını yoxlasınlar, saxlanma şəraitinə diqqət yetirsinlər. Həmçinin satıcıdan qida təhlükəsizliyi qeydiyyatından keçib-keçməməsi barədə məlumatı da tələb edə bilərlər. Xahiş edirik ki, vətəndaşlarımız gördükləri uyğunsuz hallarla bağlı Agentliyin 1003 Çağrı Mərkəzinə məlumat versinlər”.
Bölmənin digər xəbərləri
