ELM VƏ TƏHSİL
ADPU-nun professoru: Prezident İlham Əliyevin 20 illik fəaliyyəti xalqa sədaqətlə xidmət etmək nümunəsidir
Bakı, 28 oktyabr, AZƏRTAC
Ulu Öndər Heydər Əliyevin siyasi kursunun layiqli davamçısı Prezident İlham Əliyevin 20 illik fəaliyyəti xalqa qətiyyətlə, cəsarətlə və sədaqətlə xidmət etmək nümunəsidir. O, yorulmaz fəaliyyəti, beynəlxalq təşkilatlardakı qətiyyətli çıxışları ilə Azərbaycanın haqq səsini dünyaya çatdırıb, ikili standartların hökm sürdüyü Qərbin siyasi dairələrində tariximiz və 30 illik acı taleyimiz haqqında obyektiv rəy formalaşdırmağa nail olub, erməni yalanlarını ifşa edib. Beynəlxalq münasibətlər tarixini dərindən bilməsi ona peşəkar siyasətçi kimi dünyada böyük hörmət və nüfuz qazandırıb. 44 günlük Vətən müharibəsi zamanı ölkə Prezidentinin Azərbaycanı təcavüzkar dövlət kimi təqdim etməyə çalışan Qərbin aqressiv jurnalistlərinin təxribatçı suallarına beynəlxalq hüquqa, tarixi fakt və dəlillərlə əsaslanan cavabları, həm jurnalistlərə, həm də Qarabağda erməni təcavüzünü və erməni terrorunu dəstəkləyən Ermənistana və onun himayədarlarına tarixi bir dərs olub.
Bu fikirləri AZƏRTAC-a açıqlamasında ADPU-nun kafedra müdiri professor Fərrux Rüstəmov söyləyib. O vurğulayıb ki, Prezident İlham Əliyevin qətiyyətli və məqsədyönlü fəaliyyəti nəticəsində Azərbaycan Ordusu 30 illik işğala son qoymaqla, dünya hərb tarixində xeyli ilklərə imza atıb. “Məğlubedilməz erməni ordusu” barədə mif 44 gün ərzində darmadağın edilib, “Dəmir yumruq” əməliyyatı uğurla başa çatdırılıb, Şuşa şəhəri əsgərlərimizin qanı-canı bahasına düşməndən təmizlənib. Mürəkkəb relyefə malik Kəlbəcər və Laçın rayonları isə bir güllə belə atılmadan düşmən işğalından azad edilib. Bu, Müzəffər Ali Baş Komandan İlham Əliyevin cəsarətinin, siyasi uzaqgörənliyinin və Azərbaycan Ordusunun hərbi qüdrətinin təntənəsi idi.
İllər əvvəl beynimizə və qəlbimizə belə bir fikir hakim olmuşdu: “Bütün yollar Şuşaya aparır”. Şuşaya gedən yol isə ordunun müasirləşdirilməsindən, mövcud hərbi hissələrin döyüş qabiliyyətinin yüksəldilməsindən, yenilərinin yaradılmasından, hərbi infrastrukturun təkmilləşdirilməsindən, əsgər və zabit heyətinin peşəkarlığının artırılmasından keçirdi. Bunun üçün kifayət qədər maliyyə resursları və siyasi iradə lazım idi. Prezident İlham Əliyevin müəyyənləşdirdiyi hərbi doktrina əsasında Azərbaycanda ordu quruculuğu öz inkişafının yeni mərhələsinə qədəm qoydu. Müzəffər Ali Baş Komandanın diqqət və qayğısı sayəsində hərbçilərin sosial müdafiəsi gücləndirildi, mənzil problemləri həll edildi, peşəkarlıqlarının artırılması məqsədilə hərbi təlimlər təşkil edildi, şəxsi heyətin döyüş ruhu və mənəvi-psixoloji hazırlığı yüksəldi, onlara qələbə ruhu və əzmi aşılandı, Silahlı Qüvvələr üçün xarici ölkələrdən ən müasir silah və texnikalar alındı. Azərbaycan Ordusu regionun ən qüdrətli ordusuna çevrildi. Təsadüfi deyil ki, nüfuzlu “Global Fire Power” mərkəzinin 55 göstərici əsasında hazırladığı 2021-ci ilə aid hesabatında Azərbaycan Ordusu Cənubi Qafqazda birinci, dünyada ilk əlli ordu sırasında yer alır. Xarici ölkələrin hərbi mərkəzlərinin Azərbaycan Ordusunun Vətən müharibəsində qazandığı döyüş təcrübəsini öyrənməsi, hərbi taktikasından bəhrələnməsi dövlətimizin və xalqımızın qürur mənbəyidir.
“Nəyi necə etməyi yaxşı bilən Prezident İlham Əliyev son 20 ildə cəmiyyətin bütövlüyünü, sakitliyi, sabitliyi nəinki qoruyub saxladı, onu milli tərəqqinin, inkişafın hərəkətverici qüvvəsinə çevirdi. Onun dövründə böyük şücaət, qəhrəmanlıq göstərən, öz qanları ilə Vətən xəritəmizi yenidən cızan, itirilmiş torpaqlarımızı bərpa edən yeni nəsil yetişdi. Bu gənclərə qələbə ruhunu çoxşaxəli fəaliyyəti, şəxsi nümunəsi, qətiyyətli çıxışları ilə Prezident özü aşılayıb. Xalqımız sözü imzası qədər keçərli olan İlham Əliyevə inandı, etibar etdi, fəaliyyətini təqdir etdi, sevdi və Prezident seçdi. İlham Əliyev xalqın əvəzedilməz Prezidenti olmaqla bərabər, həm də Liderinə çevrildi”, - deyə professor Fərrux Rüstəmov qeyd edib.
Prezident İlham Əliyev 44 günlük Vətən müharibəsi dövründə Türkiyənin “A Haber” televiziya kanalına müsahibəsində demişdi: "İşğal edilmiş torpaqların hər bir qarışı, hər bir şəhər bizim üçün doğmadır, əzizdir. Mənim üçün hər bir kəndin dəyəri, qiyməti o biri kəndlə müqayisədə, o biri şəhərlə müqayisədə eynidir, bərabərdir. Ancaq siz də yaxşı bilirsiniz ki, Şuşanın Azərbaycan xalqının qəlbində xüsusi yeri var. Bu, bizim tarixi şəhərimizdir, qədim mədəniyyət ocağıdır. Şuşa Azərbaycan xalqına bir çox istedadlı, dahi şəxslər bəxş edibdir. Əlbəttə ki, Şuşasız bizim işimiz yarımçıq olar”.
Azad Şuşada Prezident İlham Əliyev şəhər ilə bağlı dediklərini dilə gətirdi: “Demişdim ki, Azərbaycan bayrağı Şuşada qaldırılacaq və qaldırıldı. Demişdim ki, Şuşasız qələbəmiz yarımçıq olacaq və o vaxt müharibə dövründə bundan artığını deyə bilmirdim. Çünki müharibənin aparılmasının məxfiliyi gözlənilməli idi. Müharibənin ilk günlərindən biz bilirdik ki, hədəfimiz nədir və Şuşaya doğru uğurla irəliləyirdik”.
Şuşa şəhərindən Xankəndi aydın görünürdü. Prezident İlham Əliyevin Cıdır düzündə Türkiyə Prezidenti Rəcəb Tayyib Ərdoğana Xankəndini göstərərək “oraya da gedəcəyik” deməsini xalq növbəti əməliyyatın anonsu kimi qəbul edərək, səbirsizliklə o günü gözləyirdi. Nəhayət ki, o gün gəldi. Bu ilin sentyabrında Azərbaycanın Qarabağ iqtisadi rayonunda lokal antiterror tədbirləri həyata keçirildi. Müzəffər Ali Baş Komandanın rəhbərliyi ilə Azərbaycan Ordusu 23 saat 43 dəqiqə ərzində möhtəşəm Qələbəyə imza atdı. Bununla da Prezident İlham Əliyevin “nəyi, necə, nə vaxt edəcəyimi, mən bilirəm” ifadəsi növbəti dəfə öz təsdiqini tapdı. Oktyabrın 15-də Xankəndi şəhərində Dövlət Bayrağını ucaldan Prezident İlham Əliyev dedi: “İyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır”.
ADPU-nun professoru vurğulayıb ki, Prezident İlham Əliyev 20 il ərzində verdiyi bütün vədləri, qarşısına qoyduğu bütün vəzifələri icra etməklə millətimizə Qələbə bəxş etdi. Bu, böyük xoşbəxtlikdir, böyük fərəhdir, qürur mənbəyidir.