AĞCABƏDİ ŞƏHƏRİNDƏ SUBARTEZİAN QUYULARI İSTİFADƏYƏ VERİLMİŞDİR
AZƏRTAC xəbər verir ki, ulu öndər Heydər Əliyevin 85 illik yubileyi ərəfəsində Ağcabədi şəhərinin S.Vurğun və T.İsmayılov küçələrində yaşayan əhalinin içməli suya olan tələbatını ödəmək məqsədi ilə yeni subartezian quyuları istifadəyə verilmişdir.
Bu münasibətlə keçirilən mərasimdə çıxış edən Ağcabədi Rayon İcra Hakimiyyətinin başçısı Şahin Məmmədov Azərbaycanın müstəqil dövlət kimi formalaşmasında ümummilli lider Heydər Əliyevin əvəzsiz xidmətlərindən danışmışdır. Regionların sosial-iqtisadi inkişafı Dövlət Proqramına müvafiq olaraq, qazılmış artezian quyularının əhalinin içməli su problemlərini həll edəcəyini deyən Ş.Məmmədov bildirmişdir ki, Prezident İlham Əliyevin yanvarın 17-də Ağcabədi rayonuna gəlişi bir sıra problemlərin həlli üçün stimul yaratmışdır. Dövlət başçısının Ağcabədi rayonunda əhalinin içməli suya olan tələbatını ödəmək və abadlıq, quruculuq işlərini həyata keçirmək üçün Prezidentin Ehtiyat Fondundan 2 milyon manat vəsait ayırması rayona olan qayğının bariz nümunəsidir.
Mərasimdə çıxış edən Daşınmaz Əmlakın Dövlət Reyestri Xidmətinin rəisi A.Qaraşov Prezidentin tapşırığı əsasında rayonda infrastruktur layihələrinin bundan sonra da həyata keçiriləcəyini bildirmişdir.
Sonra rayonun Şahsevən kəndində də əməkçilərin suvarma suyuna olan tələbatını ödəmək üçün qazılmış subartezian quyusunun istifadəyə verilməsi münasibətilə tədbir keçirilmişdir.
