ALMAN REJİSSORUNUN FİLMİ NÜMAYİŞ OLUNMUŞDUR

14.11.2003 [15:38]
Çap et
A⁺ A^-

Almaniyanın ölkəmizdəki səfirliyi Alman-Azərbaycan “Kapellhauz” Mədəniyyət Mərkəzində məşhur alman kinorejissoru Fayt Helmerin “Tuvalu” adlı filminin Bakıda ilk nümayişinə həsr olunmuş mərasim keçirmişdir.

Mədəniyyət mərkəzindən AZƏRTAC-ın müxbirinə demişlər ki, mərasimdə səfirliyin mədəniyyət şöbəsinin əməkdaşı Katrin Ködel çıxış edərək film barədə məlumat vermişdir. O vurğulamışdır ki, dünyanın 60-dan çox nüfuzlu beynəlxalq kino festivalında 30-dan artıq mükafat almış bu ekran əsərinin süjet xətti yuxular aləmindən bəhs edən bir əhvalat üzərində qurulubdur. Əhvalat danışıqsız təsvirlərlə nəql olunur. Lakin filmin səslər aləmi hadisənin təsvirlərindən az rol oynamır. Lentin musiqi tərtibatı da xüsusi əhəmiyyətə malikdir. Musiqinin müəllifləri Yurgen Kniper və Qoran Vreqoviçdir. Baş rollarda dünyanın tanınmış ekran ulduzları Sulpan Hamatova, Denis Lavant və Flip Klay çəkilmişlər.

Sonra “Tuvalu” filminin nümayişi olmuşdur.

Axırda jurnalistlər üçün mətbuat konfransı keçirilmiş, quruluşçu rejissor Fayt Helmer jurnalistlərin suallarına cavab vermişdir.