AMEA Naxçıvan Bölməsində “Aleksandr Sergeyeviç Qriboyedov: şair-diplomat” əsərinin müzakirəsi keçirilib
Naxçıvan, 31 yanvar, AZƏRTAC
AMEA Naxçıvan Bölməsində Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq olunmuş “Oxunması zəruri olan kitabların Siyahısı”na daxil edilən Reyhan Mirzəzadənin “Aleksandr Sergeyeviç Qriboyedov: şair-diplomat” əsərinin müzakirəsi olub.
Bölmədən AZƏRTAC-ın Naxçıvan bürosuna bildirilib ki, tədbirdə bölmənin sədri, akademik İsmayıl Hacıyev çıxış edərək əsərin məziyyətlərindən danışıb. Bildirib ki, əsərdən də məlum olduğu kimi, Aleksandr Qriboyedov diplomatik fəaliyyəti dövründə Şərq aləminə, Azərbaycana və azərbaycanlılara dərin hörmətlə yanaşıb. O, 1818-ci ildə İrandakı rus diplomatik nümayəndəliyinin katibi təyin olunandan sonra İrana gedərkən yolunu hər zaman Azərbaycandan salıb. Əsərdə ölkəmizin bir çox şəhərlərində olan şair-diplomatın 1819-cu ildə Naxçıvanla tanışlığı, burada qalması, onun yazılarında Naxçıvan, Qazançı, Culfa, Sədərək kimi şəhər və kəndlərin adlarının çəkilməsi, Naxçıvanla bağlı qeydləri, xatirə və digər yazılarından bəhs olunur. “Əcəmi” Nəşriyyat-Poliqrafiya Birliyində nəşr olunan kitab əhəmiyyət kəsb edən bir çox tarixi məqamları əhatə edir.
Vurğulanıb ki, fəaliyyəti dövründə diplomat Azərbaycan ərazilərinə ermənilərin köçürülməsinin qəti əleyhinə olub. Bu, əsərdə öz dolğun əksini tapıb.
Daha sonra bölmənin Tarix, Etnoqrafiya və Arxeologiya İnstitutunun aparıcı elmi işçisi, tarix üzrə fəlsəfə doktoru Musa Quliyev, İncəsənət, Dil və Ədəbiyyat İnstitutunun Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımov çıxış ediblər.
Sonda suallar cavablandırılıb.
Bölmənin digər xəbərləri
