SİYASƏT
AŞ Nazirlər Komitəsinin sədri Azərbycan torpaqlarının işğaldan azad edilməsinin ümdə vəzifə olduğunu bildirmişdir
Strasburq, 23 aprel (AZƏRTAC). Azərbaycan torpaqlarının işğaldan azad olması ümdə vəzifədir.
Bu fikri Avropa Şurası Parlament Assambleyasının (AŞPA) yaz sessiyasının birinci iş günündə Avropa Şurası Nazirlər Komitəsinin sədri Devid Lindinqton azərbaycanlı deputat Rafael Hüseynovun ona ünvanladığı suala cavabında səsləndirmişdir.
AŞPA-nın yaz sessiyasının ilk iş günündə Nazirlər Komitəsinin fəaliyyətdə olan sədri, Böyük Britaniyanın xarici işlər naziri Devid Lindinqton rəhbərlik etdiyi qurumun qış sessiyasından ötən dövrdə gördüyü işlər barədə hesabat vermişdir. Ənənəvi olaraq daha sonra Nazirlər Komitəsi sədri ona ünvanlanan sualları cavablandırmışdır.
Azərbaycan nümayəndə heyətinin üzvü Rafael Hüseynov sədrə belə bir sualla müraciət etmişdir: “Cənab nazir, sizə dəfələrlə burada təkrarladığımız bir problemlə bağlı növbəti dəfə oxşar sualı verdiyimə görə üzr istəyirəm. Bu sual nəticəli cavab olana qədər davam edəcəkdir. Bu sualla bir daha ona görə müraciət edirəm ki, mənim seçicilərim arasında çoxlu qaçqınlar və məcburi köçkünlər var ki, onlar 20 ildir Ermənistanın Azərbaycana təcavüzü nəticəsində faciəli həyat yaşamağa məcburdurlar. Azərbaycanda bir milyona yaxın insan var ki, onlar bizdən, o cümlədən Avropa Şurasından ənənəvi, standart, heç bir praktiki nəticəsi olmayan cavablar eşitməkdən yorulmuşlar. Onların sadə bir tələbi vardır. Onlar Azərbaycanın Ermənistan tərəfindən işğal olunmuş 20 faiz ərazisinin azad edilməsini, öz doğma yurd-yuvalarına qayıtmağı arzulayırlar. Real nəticəyə mane olan isə daha çox kənardan idarə olunan və Avropa Şurası qarşısında əsas öhdəliklərindən birini yerinə yetirməkdən boyun qaçıran Ermənistandır. Halbuki 11 il əvvəl Avropa Şurasına qəbul edilərkən Ermənistan bu problemi sülh yolu ilə həll edəcəyini öhdəlik olaraq götürmüşdür. Nazirlər Komitəsi öz səlahiyyətləri çərçivəsində Ermənistana bu istiqamətdə hansı konkret təsirləri göstərə bilər?”.
Nazirlər Komitəsinin sədri bildirmişdir ki, bu sualı hər dəfə qaldırmağa ehtiyac vardır, problem son dərəcə vacibdir və onun həlli yolu tapılmalıdır. Doğrudur, bu problemin həlli ilə bilavasitə məşğul olan ATƏT-in Minsk qrupudur. Lakin Avropa Şurasının da öhdəsinə çox iş düşür. Bizim vəzifəmiz tərəflər arasında anlaşmanın əldə olunması üçün münasib şərait formalaşdırmaqdan ibarətdir. Bu da unudulmamalıdır ki, Azərbaycan və Ermənistan quruma eyni vaxtda qəbul ediliblər və öhdəlik də bundan ibarətdir ki, məsələ sülh yolu ilə həll edilməlidir. Zənnimcə, Avropa Şurasının Nazirlər Komitəsi də problemin həllinə maksimal dərəcədə təsirini göstərməlidir.
Azərbaycan nümayəndə heyətinin digər üzvü Qənirə Paşayeva da Nazirlər Komitəsinin sədrinə sual verərək demişdir: “Cəmi bir neçə gün sonra may ayında Ermənistan tərəfindən Azərbaycanın Şuşa şəhərinin və Laçın rayonun işğalının 20-ci ili tamam olur. Artıq 20 ildir ki, yüz minlərlə azərbaycanlı qaçqın və məcburi köçkünün, o cümlədən şuşalıların və laçınlıların öz doğma torpaqlarına dönməsinə Ermənistan tərəfindən imkan verilmir. Cənab nazir, nə üçün Ermənistana işğal etdiyi Azərbaycan torpaqlarından çəkilməsi və haqları 20 ildir ki, Ermənistan tərəfindən tapdalanan yüz minlərlə azərbaycanlı qaçqın və məcburi köçkünlərin öz evlərinə dönməsi üçün AŞ-nin rəsmi İrəvana təsir və təzyiq mexanizmləri işə salınmır?
Nazirlər Komitəsinin sədri bildirmişdir: “Siz tamamilə haqlısınız ki, öz evinə dönə bilməyən yüz minlərlə qaçqın və məcburi köçkün ailəsi bundan çox əziyyət çəkir. Üstəlik, onların öz evlərinə dönmək hüququ vardır. Avropa Şurası Dağlıq Qarabağ münaqişəsinin tənzimlənməsində ATƏT-in Minsk qrupu ilə eyni səlahiyyətləri bölüşmür. Mən hesab edirəm ki, Minsk qrupu çərçivəsində hər iki ölkənin rəsmiləri kəskin bəyanatlardan yayınaraq, münaqişənin həlli yollarının tapılması üçün səylərini artırmalıdırlar. Həll yolları nə qədər tez tapılsa, qaçqın və məcburi köçkünlərin evlərinə dönə bilməməsi üçün çəkdiyi əziyyətlər o qədər tez başa çatar və onlar öz torpaqlarına qayıda bilərlər”.
Əsgər Əliyev
AZƏRTAC-ın xüsusi müxbiri
Strasburq