ATƏT PA-NIN YAY SESSİYASI ASTANADA KEÇİRİLƏCƏKDİR
AZƏRTAC xəbər verir ki, ATƏT-in Parlament Assambleyasının yay sessiyası iyunun 28-də Qazaxıstanın Astana şəhərində keçiriləcəkdir. İclasda Ermənistanın işğal etdiyi ərazilərdə törətdikləri yanğınlarla bağlı məsələnin də müzakirəsi gözlənilir. Azərbaycan nümayəndə heyəti sözügedən məsələ ilə bağlı qətnamənin qəbuluna çalışacaqdır.
ATƏT-in PA -da Azərbaycan nümayəndə heyətinin üzvü, Milli Məclisin aqrar siyasət daimi komissiyasının sədri Eldar İbrahimov bildirmişdir ki, sessiya çərçivəsində keçiriləcək “İqtisadiyyat, texnologiya və ətraf mühitin mühafizəsi” komitəsinin iclasında ermənilərin Dağlıq Qarabağda törətdikləri yanğınlar müzakirə ediləcəkdir. E.İbrahimovun dediyinə görə, artıq bütün beynəlxalq təşkilatlar, ermənilərin ətraf mühiti çirkləndirdiyini, atom elektrik stansiyasının qalıqlarını Dağlıq Qarabağda basdırmasını və işğal altında olan əraziləri intensiv şəkildə yandırmasını bilirlər.
Azərbaycan nümayəndə heyəti sözügedən məsələ ilə bağlı müvafiq sənədin qəbuluna çalışacaqdır. E.İbrahimov onu da bildirmişdir ki, ATƏT PA-nın sədri, Ermənistan-Azərbaycan, Dağlıq Qarabağ münaqişəsi üzrə məruzəçi Qoran Lenmarker də ermənilərin törətdiyi yanğınlardan xəbərdardır və Azərbaycan nümayəndə heyəti problemin məhz Q.Lenmarker tərəfindən qaldırılmasına çalışacaqdır.
Bölmənin digər xəbərləri
