Audiovizual Şura BDU-nun tələbələri üçün növbəti seminar təşkil edib
Bakı, 23 aprel, AZƏRTAC
Azərbaycan Respublikası Audiovizual Şurası, Medianın İnkişafı Agentliyi və Bakı Dövlət Universiteti (BDU) arasında imzalanmış anlaşma memorandumuna uyğun olaraq, Şura əməkdaşları BDU-nun Jurnalistika fakültəsinin tələbələri üçün növbəti seminar təşkil edib.
AZƏRTAC xəbər verir ki, “Audiovizual mediada uşaq hüquqları” mövzusunda keçirilən seminarda BDU-nun kafedra müdiri Aynur Nəsirova audiovizual media və onun tənzimləməsi məsələlərinə tələbələrin göstərdiyi maraqdan söhbət açıb. O bildirib ki, təlim-seminarların təşkili tələbələrin praktiki biliklərinin inkişaf etdirilməsi, seçdikləri peşənin sirlərinin daha dərindən öyrənilməsi baxımından mühüm əhəmiyyət kəsb edir.
Audiovizual Şuranın Kommunikasiya sektorunun müdiri Taleh Quliyev mediada uşaqların qorunması istiqamətində Şuranın son illər gördüyü işlər, keçirdiyi tədbirlər, o cümlədən bu yaxınlarda Bakıda “Media xidmətlərində uşaqların qorunması” mövzusuna həsr edilmiş Qara Dəniz Yayım Tənzimləyici Qurumlarının Forumunun (BRAF) 11-ci Toplantısı barədə ətraflı məlumat verib. Taleh Quliyev, Şura tərəfindən Azərbaycan və ingilis dillərində nəşr etdirilmiş “Audiovizual mediada uşaq hüquqlarının qorunması” adlı kitabçalar, həmçinin televiziya və radio yayımçıları üçün Şuranın təşkil etdiyi maarifləndirici tədbirlər haqqında danışıb.
Seminarın növbəti mərhələsində Audiovizual Şuranın Hüquq və beynəlxalq əməkdaşlıq şöbəsinin baş məsləhətçisi Ayxan Sadıqlı “Mediada uşaq hüquqlarının qorunması” mövzusunda geniş təqdimat edib. Ayxan Sadıqlı tələbələrə audiovizual media subyektləri və onlarının fəaliyyətində uşaq hüquqlarının qorunması, bu sahədə qanunvericiliyin tələbləri və icra mexanizmləri ilə bağlı ətraflı məlumat verib. O, həmçinin dövlətin uşaq siyasəti, bu istiqamətdə beynəlxalq təcrübənin öyrənilməsi, Azərbaycanın beynəlxalq konvensiyalara qoşulması haqqında danışmışdır.
İnteraktiv şəkildə davam edən seminar tələbələri maraqlandıran sualların cavablandırılması və real hadisələr-nümunələrin izahı ilə davam edib. “Audiovizual mediada uşaq hüquqlarının qorunması” adlı kitabçalar Jurnalistika fakültəsinin kitabxanasına hədiyyə edilib.
Bölmənin digər xəbərləri
