AZƏRBAYCAN AĞIR ATLETLƏRİ AVROPA ÇEMPİONATINDA MÜBARİZƏNİ DAVAM ETDİRİRLƏR
AZƏRTAC xəbər verir ki, İtaliyanın Linyano şəhərində keçirilən ağır atletika üzrə Avropa çempionatında Azərbaycanın daha iki idmançısı mübarizəni başa vurmuşdur.
İdmançılarımız Turan Mirzəyev və Əfqan Bayramov ( hər ikisi 69 kq) çempionatda yüksək nəticə göstərə bilməmişlər. T.Mirzəyev birdən qaldırmada 146 kiloqramın öhdəsindən gələrək ilk hissəni 3-cü pillədə başa vurmuşdur. Təkanla qaldırma zamanı 3 dəfə podiuma çıxan Turan Mirzəyev uğurlu çıxış edə bilməmişdir.
Digər idmançımız Əfqan Bayramov isə ümumilikdə 309 kiloqramı (136+173) başı üzərinə qaldırmaqla 5-ci yer tutmuşdur.
Xatırladaq ki, yarışın ilk günündə mübarizəyə qoşulmuş Zülfüqar Süleymanov 5-ci, Sərdar Həsənov isə 6-cı pillədə qərarlaşmışlar.
Qeyd edək ki, növbəti günlərdə yığmamızın digər üzvləri Namiq Cəmilov (77 kq), İntiqam Zairov (85 kq), Əlibəy Səmədov və Rövşən Fətullayev (hər ikisi 94 kq) mübarizə aparacaqlar.
Bölmənin digər xəbərləri
