İDMAN
Azərbaycan cüdoçuları ilin əsas yarışına hazırlaşırlar
Bakı, 1 iyul (AZƏRTAC). Rio-de-Janeyroda cüdo üzrə dünya çempionatının başlanmasına iki aydan az qalır. Bu çempionat Azərbaycan yığması üçün mövsümün əsas sınağı olacaqdır. Hazırda komandamız Yaponiyada məşq toplantısındadır. Lakin artıq indidən əminliklə deyə bilərik ki, bəzi idmançılarımız bu mundialı seçmə atletlər kimi başlayacaqlar. Beynəlxalq Cüdo Federasiyasının (İJF) keçən həftənin sonunda dərc edilmiş reytinqi belə söyləməyə əsas verir.
Bu yaxınlarda San-Salvadorda Azərbaycan kollektivinin iştirak etmədiyi qitə kuboku yarışlarından sonra İJF ranqlar cədvəlini dərc etmişdir. Mundialda seçim üçün həmin cədvəl əsas götürüləcəkdir. Düzdür, dünya çempionatı başlanana qədər bir neçə turnirə start veriləcəkdir, lakin onların nəticələri reytinq cədvəlindəki vəziyyətə ciddi təsir etməyəcəkdir. Reallıq isə belədir ki, hələlik reytinq cədvəlində ikinci yeri tutan Elxan Məmmədov (100 kq) təsnifatda aparıcı idmançılardan biri sayılır. Bu siyahıda Elxandan əvvəl yalnız bir cüdoçu var - hollandiyalı Xenk Qrol. E.Məmmədov Tümendə “World Masters” turnirinin finalında Qrola qalib gəlmişdi. Üstəlik, həmin çəki dərəcəsində 7-ci yeri Elmar Qasımov tutur. Buna görə çox ehtimal ki, məşqçilərin qərargahı bizim cüdoçuların hər ikisini Rioya dəvət edəcəkdir, çünki çempionatın reqlamentinə görə, hər bir ölkə 7 çəki dərəcəsinin ikisində iki cüdoçu təqdim edə bilər.
Bizim digər idmançımız - Olimpiya dövrəsini uğurla başlamış Nicat Şıxəlizadə (66 kq) də dünya üzrə ilk səkkizlikdədir. London Olimpiya Oyunlarının iştirakçısı Tərlan Kərimov isə hələlik ikinci rollarla kifayətlənir. Bu mövsümdə elə bir yaddaqalan uğur qazanmamış Tərlan reytinq cədvəlində 29-cu yeri tutur. 60 kq çəki dərəcəsində çıxış edən İlqar Müşkiyev ondan bir pillə yuxarıdadır, lakin bunun başqa səbəbləri var. Zədələndiyi üçün müalicə olunan və praktiki olaraq çıxış etməmiş İlqar kondisiya səviyyəsinə yenicə yaxınlaşmaqdadır.
Bakıda keçirilmiş “Böyük dəbilqə” turnirinin qəhrəmanları Rüstəm Orucov (77 kq) və Şahin Qəhrəmanov (90 kq) reytinq cədvəlində 11-ci yerdədirlər. Onlar “ev startı”ndan sonra Tümendə keçirilən “World Masters” turnirində çıxış etmiş, lakin bu turnir onlar üçün uğursuz olmuşdur. Buna görə də reytinq cədvəlində onlar rəqiblərinin çoxundan geridədirlər.
Bununla belə, əgər Azərbaycan cüdoçuları dünya çempionatında uğurla çıxış edərlərsə, onlar əvvəlki səhvlərin əvəzini çıxa bilərlər. Rio-de-Janeyro turniri Pekin Olimpiadasının çempionu Elnur Məmmədli üçün (81 kq) həqiqət anı olmalıdır. Hazırda Elnur 39-cu yeri tutur. Lakin ədalət naminə deməliyik ki, London çempionatından sonra o, cəmi bir dəfə çıxış etmişdir. Ümid edirik ki, Elnur Braziliyada özünü daha yaxşı göstərəcəkdir.
Qadınların reytinqində Kifayət Qasımova (57 kq) 24-cü, Ramilə Yusubova (63 kq) 40-cı yerdədir. Çox ehtimal ki, Ramilənin reytinq göstəricisi bir qədər də azalacaqdır, çünki olimpiadadan sonra o, heç çıxış etməmişdir.