Bakı, 29 iyun, AZƏRTAC

Üçüncü Bakı Piano Festivalı çərçivəsində Maqsud İbrahimbəyovun hekayələri əsasında hazırlanmış tamaşa və braziliyalı musiqiçilərin iştirakı ilə cazmen Şahin Növrəslinin konserti təqdim edilib. Tədbir “Rotunda Roof Garden”də keçirilib.

AZƏRTAC xəbər verir ki, gecənin qonaqları İsmayıl İmanın (rejissor Tərlan Rəsulovdur) “Bağçada rahat yer” əsərinin unikal quruluşda tamaşasına baxıblar. Tamaşa Azərbaycanın Xalq yazıçısı Maqsud İbrahimbəyovun “Bağçada rahat yer”, “Püstə ağacı” və “Əlvida, Miledi!” hekayələri əsasında hazırlanıb. Rolları Azərbaycanın Əməkdar artistləri Şahin Növrəsli, Elşən Rüstəmov və Mələk Abbaszadə ifa ediblər.

Teatr tamaşası rəvan şəkildə parlaq konsertə çevrilib və musiqi ifaları əsnasında cazmen Şahin Növrəsli “Isac Jamba Group”un braziliyalı musiqiçiləri ilə birlikdə bir neçə kompozisiya ifa edib. Festivalın əcnəbi iştirakçıları - İsak Camba (zərb alətləri) və Lusiano Vaskoncelos da Silva (bas gitara) da Azərbaycan bəstələrini ifa ediblər və bu, tamaşaçıların sürəkli alqışları ilə qarşılanıb.

Konsertdən sonra İsak Camba öz çıxışı və Azərbaycana səfəri ilə bağlı təəssüratlarını AZƏRTAC-ın müxbiri ilə bölüşüb.

Musiqiçi deyib: “Bu gün Şahin Növrəsli ilə çıxış etmək mənim üçün heyrətamiz bir təcrübə idi! Bu, həm də çətin idi, çünki Şahin caz pianoçusu olsa da, çox qeyri-adi ifaçıdır. Bir-iki Azərbaycan melodiyasını da ifa etdik və bunlar heyrətamiz idi. Elə alındı ki, tamaşanın bir hissəsi olduq və bunu bizim üçün maraqlı təcrübə adlandırmaq olar. Hesab edirəm ki, Azərbaycana mütləq yenidən gəlməliyik. Bu, ölkənizə ilk səfərimizdir. Mən sözün yaxşı mənasında heyrətlənirəm; Bakı o qədər böyük, gözəl, mürəkkəb şəhərdir ki, həm də çox işıqlıdır. Mən ölkələrimizin mədəniyyətləri arasında böyük əlaqənin də şahidi oldum, burada özümü çox rahat hiss edirəm”.

Festivalın direktoru Şahin Növrəsli də öz hisslərini ifadə edib: “Bu gün bizim çox maraqlı layihəmiz var, bu, konsertlə musiqili tamaşadır. Mənim üçün inanılmaz maraqlı tədbir oldu. Rol oynadığım tamaşadan konsertə keçidi çox bəyəndim. Braziliyalı həmkarlarımızla əla əməkdaşlığımız var idi - başqa musiqiçilərin çıxışıma qoşulması mənim üçün həmişə maraqlı olur. “Isac Jamba Group”un əsas konserti festivalın bağlanışı zamanı olacaq, amma mənim də orada iştirak etməyimi istəyirlər. Bundan əlavə, braziliyalı qonaqlarımız caz festivalında iştirak etmək üçün Braziliyaya getməyimi tövsiyə edirlər. Noyabrda mən onların bu təklifini yerinə yetirəcəyəm”.

Tədbirdə mərhum yazıçının həyat yoldaşı, Maqsud İbrahimbəyov Yaradıcılıq Mərkəzinin direktoru Anna İbrahimbəyova da iştirak edib. O deyib: “İfanı çox bəyəndim. Mən Şahini çox sevirəm və braziliyalı musiqiçiləri bəyəndim, onlar da süjetə daxil olmuşdular. Bu axşam çox xoşbəxtəm”.

İyunun 16-dan 29-dək Azərbaycan paytaxtında III Bakı Piano Festivalı keçirilir. Bakılılar və şəhərin qonaqları üçün müxtəlif ölkələrin virtuozlarının musiqi konsertləri, film nümayişləri və bədii tədbirlərdən ibarət rəngarəng proqram hazırlanıb.