AZƏRBAYCAN HÖKUMƏT NÜMAYƏNDƏ HEYƏTİNİN SVERDLOVSK VİLAYƏTİNƏ SƏFƏRİ BAŞA ÇATDI
Baş nazir Artur Rasizadənin rəhbərliyi ilə Azərbaycan hökumət nümayəndə heyətinin Sverdlovsk vilayətinə üçgünlük səfəri iyulun 11-də başa çatmışdır.
Yekaterinburqun “Koltsovo” hava limanında nümayəndə heyətinin üzvlərini Sverdlovsk vilayəti hökumətinin sədri Aleksey Vorobyov, vilayətin sahə nazirliklərinin rəhbərləri yola saldılar.
Sverdlovsk vilayətinin beynəlxalq və xarici siyasi əlaqələr naziri Yuri Osintsev AZƏRTAC müxbirinin sualına cavabında dedi ki, Azərbaycan hökumət nümayəndə heyətinin uğurlu səfəri və Rusiyanın ən iri regionlarından biri olan Sverdlovsk vilayəti ilə əlaqələrin genişləndirilməsi prezidentlər Heydər Əliyevin və Vladimir Putinin Azərbaycan və rus xalqlarının daha da yaxınlaşmasına yönəldilmiş müdrik siyasətinin nəticəsidir.
Səfər zamanı Sverdlovsk vilayətinin qubernatoru Eduard Rossel, vilayət hökumətinin sədri Aleksey Vorobyov, “Uralmaş” və “Uraltransmaş” kimi nəhəng sənaye müəssisələrinin rəhbərləri ilə faydalı fikir mübadiləsi aparıldı. Diqqətəlayiq haldır ki, indinin özündə Azərbaycan sahibkarları vilayətin iqtisadiyyatına sərmayə qoyurlar. Sərmayəçilərimiz burada altı birgə müəssisədə təmsil olunmuşlar. Vilayət hökumətinin rəhbərləri bildirdilər ki, əmtəə mübadiləsinin həcmi ildən-ilə artır, ixrac malları arasında isə ərzaq, maşınqayırma və kimya məhsulları üstünlük təşkil edir.
Günün birinci yarısında hökumət nümayəndə heyəti Bakıya gəldi. Binə hava limanında baş nazir Artur Rasizadəni və nümayəndə heyətinin üzvlərini Nazirlər Kabinetinin rəhbər işçiləri, digər rəsmi şəxslər qarşıladılar.
Bölmənin digər xəbərləri
