Bakı, 8 sentyabr, AZƏRTAC

Prezident İlham Əliyevin Türk Dövlətləri Təşkilatının təbii fəlakət və fövqəladə halların idarə edilməsi üzrə üzv və müşahidəçi dövlətlərinin nümayəndələrini qəbul edərkən çıxışı təsisatın yaxın perspektiv üzrə fəaliyyəti üçün yol xəritəsi hesab edilə bilər.

Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.

O qeyd edib ki, dövlətimizin başçısının siyasi ritorikası artıq Türk Dövlətləri Təşkilatı barədə daha uca səslə danışmağın zamanının gəldiyini göstərir.

Nəzərə almalıyıq ki, hazırkı həssas periodda böyük insan kapitalı, təbii sərvətləri, xüsusən enerji ehtiyatları, əlverişli coğrafi mövqeyi Türk dünyası üçün böyük fürsətlər açıb. Türk dünyası Şərq və Qərb arasında alternativsiz və ən təhlükəsiz qovşaqdır. Üstəlik Türkiyənin güclənən mövqeyi, Azərbaycanın Qələbəsindən sonra artan hərbi-siyasi imkanları, Orta Asiyaya daha çox diqqət yetirilməyə başlanması Türk dünyasının özündən fərqli davranış tələb edir. Prezident İlham Əliyevin nümayiş etdirdiyi siyasi ritorikası da məhz bu reallığın inikası hesab olunmalıdır.

Qarşıya qoyulan məqsədlər kifayət qədər aydındır, ilk zəruri şərt isə birgə hərəkətdir. Dövlətimizin başçısı İlham Əliyevin təbirincə desək, “biz hər zaman bir-birimizin yanında olmalıyıq”. Azərbaycan Prezidenti bunu çox rahatlıqla deyə bilir, çünki təcrübədə onun özünün rəhbərliyi ilə Azərbaycan nümunəsi var. Prezident İlham Əliyevin dediyi kimi, “bizim xarici siyasət prioritetləri arasında Türk Dövlətləri Təşkilatına üzv ölkələrlə əlaqələr birinci yer tutur”.

Bəhruz Məhərrəmovun sözlərinə görə, ötən dövr üzrə təcrübə göstərir ki, Türk Dövlətləri Təşkilatı qlobal müstəvidə özünü doğrulda və layiqli yerini tuta bilib. İndi qarşıda duran hədəf isə təsir imkanlarımızın daha da genişləndirilməsidir. Bu hədəfə çatmaq üçün isə Prezident İlham Əliyev yol xəritəsinin subplanlarını da bəyan etdi - iqtisadi əlaqələrin gücləndirilməsi, siyasi müstəvidə daimi koordinasiya və məsləhətləşmələrin aparılması, təhlükəsizlik sahəsində qarşılıqlı yardım. Proseslərin gedişi isə qaneedicidir. Ölkə Prezidenti yaxın gələcəkdə Təşkilatın dünyadakı mövqeyinin və rolunun daha da artacağı qənaətindədir.

“Görüşün ən mühüm aspekti isə heç şübhəsiz ki, Azərbaycan Prezidentinin Şimali Kipr bəyanatı oldu: “Şimali Kiprin bayrağı bizim tədbirdə dalğalanmalıdır və dalğalanacaqdır”. Bu, Azərbaycana münasibətdə ikili standartlardan çıxış edən, etnik düşmənçilik və təhlükəli hədd almış separatizmə dəstək verənlərə Bakının layiqli cavabı oldu. Azərbaycan Lideri bir daha göstərdi ki, biz hər kəslə haqq etdiyi və anladığı dillə danışa biləcək hərbi-siyasi gücük”, - deyən deputat əlavə edib ki, Şimali Kiprə dair sonrakı mövqeyimiz də çox aydındır. Azərbaycan bütün Türk dünyasında birləşən qardaşlarımızın hər zaman yanında olubdur. Biz haqq yolunda hər zaman bir-birimizin yanındayıq və yanında olacağıq.