Möhtərəm cənab Prezident! 

Biz, Azərbaycan Həmkarlar İttifaqları idman təşkilatlarının işçiləri, məşqçiləri və idmançıları AFFA prezidenti Fuad Musayevin Sizə ünvanladığı və bir sıra qəzetlərdə dərc edilmiş açıq məktubunun məzmunundan hiddətlənmişik, burada deyilənlərə və müəllifin özünə qəti etirazımızı bildiririk.

Ölkəmizin futbolunun bugünkü acınacaqlı vəziyyətinin bilavasitə səbəbkarı olan şəxslərin və onların rəhbərlik etdiyi AFFA-nın fəaliyyəti, daha doğrusu, fəaliyyətsizliyi göz qabağındadır. Bu azmış kimi, onlar ölkəmizin bədən tərbiyəsi və idman hərəkatında baş verən böyük dəyişiklikləri və irəliləyişləri də inkar edir, bunları görmək istəmirlər.

1994-cü, xüsusən də 1997-ci ildən başlayaraq, respublikamızda bədən tərbiyəsi və idmanın inkişafında dövlətimizin başçısı cənab Heydər Əliyevin və Milli Olimpiya Komitəsinin prezidenti İlham Əliyevin göstərdikləri xidmətləri görməmək, danmaq və bu işlərə qara yaxmaq cəhdi, sadəcə olaraq, haqsızlıqdır.

1990-1993-cü illərdə respublikamızın qarşılaşdığı problemlər, mənfur qonşumuz tərəfindən elan edilməmiş müharibə, ölkədaxili çəkişmələr, hakimiyyət uğrunda mübarizə, sosial sahənin, o cümlədən bədən tərbiyəsi və idmanın inkişafını, demək olar ki, unutdurmuşdu. Fəaliyyətləri dayandırılmış həmkarlar ittifaqları idman cəmiyyətlərinin taleyi, əmək kollektivlərində çalışan insanların sağlamlığının qorunması və möhkəmləndirilməsi, onların bədən tərbiyəsi və idmanla məşğul olması məsələləri heç kəsi maraqlandırmırdı. Məhz belə bir ağır vəziyyətdə öz xalqının, millətinin sağlamlığını və idman şərəfini uca tutan dahi bir şəxsiyyətin, hamımızın böyük və dərin hörmət bəslədiyi Heydər Əlirza oğlu Əliyevin respublikamıza rəhbərliyə qayıtması bütün idman ictimaiyyətində, o cümlədən mütəxəssis və idmançılarda nikbin əhval-ruhiyyə, idmanımızın sabahına böyük ümidlə baxmağa zəmin yaratdı.

Ölkə daxilində qeyri-sabitliyin, vətəndaş müharibəsi təhlükəsinin, Azərbaycanı parçalamaq cəhdlərinin, ağır iqtisadi böhranın aradan qaldırılması kimi taleyüklü problemlərlə məşğul olan möhtərəm Prezident, eyni zamanda, öz xalqının sağlamlığı və idmanın inkişafı məsələlərinin həllinə də vaxt tapırdı.

Artıq 1994-cü ildə respublikamızda bədən tərbiyəsi və idmana rəhbərliyin dövlət səviyyəsində təmin edilməsi məqsədi ilə Prezidentin təşəbbüsü və Fərmanı ilə ilk dəfə olaraq Gənclər və İdman Nazirliyi yaradıldı. Vaxt və həyat Sizin bu təşəbbüsünüzün nə qədər vacib və lazımlı olduğunu bir daha sübut etdi. Bu illər ərzində əvvəllər fəaliyyətləri dayandırılmış bütün həmkarlar ittifaqları idman təşkilatları, o cümlədən böyük tarixə və ənənəyə malik olan “Məhsul”, “Spartak”, “Zenit”, “Gənclik” (“Burevestnik”), “Lokomotiv” idman cəmiyyətləri bərpa olundu. Bundan əlavə, yeni-yeni idman klubları yaradıldı.

Möhtərəm Prezidentimizin şəxsən göstərişi ilə ilk dəfə olaraq 1997-ci ildə Azərbaycanda “Bədən tərbiyəsi və idman” haqqında Qanun qəbul olundu. Bu illər ərzində Sizin idman ictimaiyyəti və idmançılarla keçirdiyiniz mütəmadi görüşlər, problem xarakterli nitqləriniz bədən tərbiyəsi və idmana diqqət göstərilməsinə dair çağırışlarınız bu sahənin sürətlə inkişaf etməsində xüsusi rol oynadı.

Respublikanın idman ictimaiyyətinin arzusu ilə 1997-ci ildə Milli Olimpiya Komitəsinin prezidenti seçilmiş cənab İlham Əliyevin qısa müddət ərzində ölkə idmanının beynəlxalq aləmdə tanınmasına nail olması xalqımız tərəfindən böyük ruh yüksəkliyi ilə qarşılandı.

Sidneydə XXVII yay Olimpiya oyunlarında əldə edilmiş ən yüksək nailiyyətlər, dünya, Avropa birinciliklərində və digər beynəlxalq yarışlarda qazanılmış çoxlu sayda medallar, bir çox növlərdə, xüsusən idmanın oyun növlərində nəzərə çarpacaq irəliləyişlər, ölkə idmanına beynəlxalq təşkilatların münasibətlərinin yaxşılığa doğru dəyişilməsi, dünya və Avropa miqyaslı bir çox yarışların keçirilməsinin bizə etibar edilməsi, şəhər və rayonlarımızda beynəlxalq standartlara cavab verən müasir tipli olimpiya idman komplekslərinin inşası, idman işçilərinin, məşqçilərin və idmançıların əməyinin layiqincə qiymətləndirilməsi - budur İlham Əliyevin idmanımızdakı fəaliyyətinin əsl faktları.

Həmkarlar ittifaqları idman təşkilatlarının ağır maliyyə vəziyyəti, maddi-texniki bazalarının zəifliyi MOK-un prezidenti cənab İlham Əliyevin daim diqqət mərkəzində olub. Məhz onun müraciətindən sonra bir çox nazirliklər, baş idarələr onlara xidmət göstərən idman təşkilatları ilə sıx əməkdaşlığa başlayıblar. Bəzi sahələr üzrə isə baş idarələrin bilavasitə strukturunda idman-sağlamlıq mərkəzləri yaradılmışdır (“Lokomotiv”, “Xəzər”, “Kimyaçı”, “Babək”, “Gömrükçü”, “Azal”, “Neftçi”, “Rabitəçi” və s.).

1997-ci ildə baş vermiş yanğın nəticəsində tam yararsız vəziyyətə düşmüş “Pəhləvan” güləş idman klubunun bazasının yenidən ən yüksək səviyyədə bərpası, həmkarlar ittifaqları idman təşkilatlarına daim qayğı və kömək göstərilməsi - budur İlham Əliyevin kütləvi bədən tərbiyəsi və idmanın inkişafı sahəsindəki xidmətlərinin reallığı.

Bütün bunlar danılmaz fakt və tarixdir. Tariximizi təhrif etmək istəyənlər isə qoy öz vicdanları qarşısında cavab versinlər.

Çox hörmətli Prezidentimiz!

Sizə ünvanlanmış açıq məktubdakı bir fikir, doğrudan da, bizim hamımızın, respublikamızın idman ictimaiyyətinin, idmansevərlərin və xalqımızın arzusu ilə üst-üstə düşür.

Ölkəmizin futboluna dövlət səviyyəsində daha yüksək və ciddi münasibət göstərilməlidir. Bu, ilk növbədə futbolumuzun inkişafına rəhbərlik edən ictimai qurumun fəaliyyətinə yenidən baxılması və bu qurumun işinə rəhbərliyin futbolumuzun şərəfini yüksəklərə qaldıra biləcək mütəxəssislərə etibar edilməsində öz əksini tapmalıdır.

Bu məsələlərin həllində Sizin təcrübənizə böyük ehtiyac duyur və bir vaxt Tofiq Bəhramov adına Respublika stadionunu futbolumuza qaytardığınız kimi, bu gün də futbolun xalqımıza qaytarılmasına kömək göstərməyinizi xahiş edirik.

Dərin hörmət və ehtiramla,

Azərbaycan Həmkarlar İttifaqları idman

təşkilatları fəalları toplantısının iştirakçıları

Bakı şəhəri, 9 yanvar 2003-cü il