Azərbaycan Universitetinin tələbələrinə beynəlxalq kompüter və dil sertifikatı veriləcək
Bakı, 3 may, AZƏRTAC
Beynəlxalq sertifikatların geniş karyera imkanlarını, daxili və xarici əmək bazarında qazandırdığı üstünlükləri nəzərə alan Azərbaycan Universitetində aylıq 200 manat təqaüd alan əlaçı tələbələr üçün “ECDL” və “PTE” təlimləri təşkil olunub.
Universitetdən AZƏRTAC-a bildirilib ki, təlimlərdə 20 tələbə iştirak edir. “ECDL” dərsləri həftədə 2 dəfə və hər dərs 90 dəqiqə olmaqla təşkil edilir və kompüterin əsasları, onlayn biliklər, mətn prosessoru, elektron cədvəllər, təqdimat modulları üzrə aparılır.
Təlimlərdən sonra keçiriləcək imtahanlarda uğur qazanan tələbələr ingilis dili biliklərini və kompüter bacarıqlarını beynəlxalq səviyyəli sertifikatla təsdiq edə biləcəklər. Bu isə arzuedilən peşəyə sahib olmaq üçün universitet təhsili ilə yanaşı, mühüm addımlardan biridir. Bütün dünyada tanınan və qəbul edilən sertifikatları əldə etmək həm yerli iş bazarında rəqabət qabiliyyətini artırır, həm də xarici ölkələrdə işləmək imkanı yaradır.
Dünyada kompüter savadlılığını təsdiq edən standartlar içərisində “ECDL” sertifikatı daha geniş yayılıb və 150-dən çox ölkə tərəfindən tanınır. Azərbaycan Universiteti beynəlxalq “ECDL” sertifikat proqramının (European Computer Driving Licence - Avropa Kompüter Səviyyəsi Ölçmə Sertifikatı) ölkəmizdəki rəsmi Akkreditasiya Olunmuş Test Mərkəzi (ATM) olaraq fəaliyyət göstərir.
PTE (Pearson Test of English) isə “IELTS” və “TOEFL” ilə yanaşı, ingilis dili biliyini beynəlxalq səviyyədə təsdiq edən ən məşhur sertifikatlardan biridir. Azərbaycan Universiteti “PTE”nin imtahan alt mərkəzi kimi təsdiq olunub.
Daha əvvəl Azərbaycan Universitetinin 70 tələbə və əməkdaşı müxtəlif modullu “ECDL”, 9 tələbəsi isə Intermediate (CEFF B1) səviyyəsi üzrə PTE dil sertifikatını əldə edib.
Bölmənin digər xəbərləri
