AZƏRBAYCAN XALQININ TALEYİNDƏ DÖNÜŞ ANI - MİLLİ QURTULUŞ GÜNÜ
AZƏRTAC xəbər verir ki, iyunun 14-də Hyatt Regency-Naxçıvan mehmanxanasında Yeni Azərbaycan Partiyası 15 İyun - Milli Qurtuluş gününə həsr olunmuş konfrans keçirmişdir. Konfrans iştirakçıları əvvəlcə Fəxri xiyabana gələrək xalqımızın ümummilli lideri, müasir Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da məzarı üzərinə gül dəstələri qoyulmuşdur.
Tarixi bayram münasibətilə konfrans iştirakçılarını təbrik edən Yeni Azərbaycan Partiyasının sədr müavini-icra katibi, Milli Məclisin deputatı Əli Əhmədov 15 İyunun Azərbaycan tarixində tutduğu yerdən danışaraq bildirmişdir ki, bu gün xalqımızın taleyində dönüş anı olmuşdur. Ümummilli lider Heydər Əliyevin xalqımızın təkidli tələbi ilə hakimiyyətə qayıdışı müstəqil dövlətçiliyimizi anarxiyadan, parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etdi. Ulu öndərin işləyib hazırladığı müstəqil dövlət quruculuğu konsepsiyası müasir Azərbaycan dövlətinin uğurlarının bünövrəsində dayanaraq gələcək inkişafın, misli görünməmiş uğurların əsasını qoydu. Hazırda Azərbaycanın dünyada analoqu olmayan bir sürətlə inkişaf etməsinin məhz Qurtuluş günü ilə başlamasını bir daha vurğulayan Əli Əhmədov həmin siyasətin bu gün Prezident İlham Əliyev tərəfindən böyük uğurla davam etdirildiyini diqqətə çatdırdı. Qarşıdakı prezident seçkilərinə toxunan YAP sədrinin müavini son 5 ildə ölkədə aparılan nəhəng quruculuq işlərinin canlı şahidi olmuş seçicilərin yalnız bir namizədə - Heydər Əliyev ideyalarının ən layiqli davamçısı İlham Əliyevə səs verəcəklərinə heç kimin şübhəsi olmadığını qeyd etdi. Çünki bu gün Azərbaycanın bütün dünya tərəfindən etiraf olunan dinamik inkişafı ilk növbədə vətəndaşlarımızın maddi-rifah halının yaxşılaşmasına xidmət edir, paytaxtla bərabər regionlar da sürətli tərəqqi yolu ilə inamla addımlayır.
Hacıbala Abutalıbov ulu öndər Heydər Əliyevin siyasətdə, iqtisadiyyatda və mədəniyyətdə qoyduğu izlərin heç vaxt silinməyəcəyini deyərək vurğuladı ki, unudulmaz rəhbərin Azərbaycan xalqının xoşbəxt gələcəyi üçün açdığı yolla əbədiyyətə qədər addımlayacağıq.
“Heydər Əliyev hakimiyyətə gəlməsəydi nə olardı” sualına cavab verməyə çalışan Milli Məclisin deputatı Fəttah Heydərov bildirdi ki, əgər ulu öndər iqtidara qayıtmasaydı, xalqımızın başına XX əsrin 80-90-cı illərində baş verən faciələrdən qat-qat ağır müsibətlər gələrdi. Yağı düşmən torpaqlarımıza daha çox yiyələnər, milli dövlətçiliyimiz isə məhv edilərdi. Biz ulu Tanrıya minnətdar olmalıyıq ki, Heydər Əliyev rəhbərliyə qayıtdı, xalqımızı bir yerə cəmləyərək faciələrin qarşısını aldı, müdrik siyasəti ilə Azərbaycanın bugünkü uğurlarının əsasını qoydu.
Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva Milli Qurtuluş günündən sonra ümummilli lider Heydər Əliyevin hüquqi, demokratik və dünyəvi dövlət quruculuğu yolunu tutmasından, ulu öndərin qadın, ailə və uşaq problemlərinə böyük önəm verərək bu işi dövlət siyasəti səviyyəsinə qaldırmasından danışdı. Qeyd etdi ki, görkəmli dövlət xadiminin müəyyən etdiyi bu humanist siyasət ulu öndərin adını daşıyan Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyeva tərəfindən də layiqincə davam etdirilir.
YAP İdarə Heyətinin üzvü, Milli Məclisin deputatı Nizami Xudiyev, partiyanın Siyasi Şurasının üzvü, Milli Məclisin deputatı Bəxtiyar Əliyev və başqaları konfransda çıxış edərək vurğuladılar ki, hələ keçmiş sovet hakimiyyəti dövründə Azərbaycan KP MK-nın birinci katibi olarkən Heydər Əliyev müstəqilliyin təməlini həm iqtisadi, həm hərbi, həm kadr hazırlığı, həm də digər sahələrdə atdığı addımlarla qoymuşdu. Bildirildi ki, XX əsrin sonlarında, xüsusilə SSRİ-nin dağılması ərəfəsində və müstəqilliyimizin ilk illərində xalqımızın başına açılan müsibətlərin səbəbi məhz milli rəhbərimizin olmamasından irəli gəldi. Əgər Heydər Əliyev Dağlıq Qarabağ münaqişəsi başlayan zaman hakimiyyət başında dayansaydı, nə torpaqlarımız işğal edilər, nə də 1 milyon məcburi köçkün və qaçqınımız olardı.
Vurğulandı ki, hakimiyyətə qayıtdıqdan sonra həyata keçirdiyi islahatlar, yeritdiyi siyasət nəticəsində Azərbaycanı bütün dünyaya tanıdan ümummilli lider xalqımızın öz seçimində yanılmadığını sübut etdi. Sevindirici haldır ki, dahi öndərin əsasını qoyduğu ideyalar bu gün Prezident İlham Əliyev tərəfindən uğurla həyata keçirilir, Azərbaycan xalqı onun rəhbərliyi altında xoşbəxt gələcəyə doğru qətiyyətlə addımlayır.
######
 |
 |
Bölmənin digər xəbərləri
