Bakı Ali Neft Məktəbi ilə İstanbul Aydın Universiteti arasında əlaqələr genişlənir
Bakı, 1 aprel, AZƏRTAC
Bakı Ali Neft Məktəbində (BANM) İstanbul Aydın Universitetinin rektoru Mustafa Aydın və onun rəhbərlik etdiyi nümayəndə heyətilə görüş keçirilib.
BANM-dən AZƏRTAC-a bildirilib ki, görüşdə rektor Elmar Qasımov rəhbərlik etdiyi ali məktəbin tələbələri, uğurları, yenilikləri haqqında məlumat verib.
Mustafa Aydın BANM-in möhtəşəm kampusu və yüksək ballı tələbələri olduğunu xüsusi vurğulayıb. Daha sonra o, qurucusu olduğu Avrasiya Universitetlər Birliyinin fəaliyyətindən danışıb. Bakı Ali Neft Məktəbinin də üzvü olduğu birliyin növbəti beynəlxalq sərgisindən söz açan Mustafa Aydın BANM ilə birgə Azərbaycan təhsilinin dünyada tanıdılması istiqamətində işlər görməyə hazır olduğunu bildirib. O, ali məktəbi hər il minlərlə dünya universitetlərinin qatıldığı və Şimalı Amerikada təşkil olunan NAFSA və digər təhsil sərgilərinə dəvət edib.
Görüş zamanı, həmçinin universitetlərarası münasibətlərin inkişaf etdirilməsi, tələbə mübadilə proqramlarının işlənməsi və reallaşdırılması istiqamətində müzakirələr aparılıb.
Nümayəndə heyəti BANM-ın kampusuna da baş çəkərək buradakı infrastrukturla tanış olublar.
Bölmənin digər xəbərləri
