BAKI DÖVLƏT UNİVERSİTETİ ALİMLƏRİNİN KİTABLARININ SƏRGİSİ AÇILMIŞDIR
AZƏRTAC xəbər verir ki, aprelin 21-də Azərbaycan Dövlət Pedaqoji Universitetində (ADPU) Bakı Dövlət Universiteti (BDU) alimlərinin kitablarının sərgi-yarmarkası açılmışdır.
Bu münasibətlə keçirilən tədbirdə ADPU-nun rektoru, AMEA-nın müxbir üzvü Yusif Məmmədov ümummilli liderimiz, müstəqil dövlətimizin memarı və qurucusu Heydər Əliyevin Azərbaycan elminin və təhsilinin inkişafına daim böyük önəm verdiyini, ulu öndərimizin nurlu ideyalarının ölkə Prezidenti İlham Əliyev tərəfindən uğurla həyata keçirildiyini bildirmişdir.
Rəhbərlik etdiyi ali məktəb ilə Bakı Dövlət Universiteti arasında geniş əlaqələr olduğunu deyən rektor elmin, təhsilin inkişafında kitabın əvəzsiz rolunu diqqətə çatdırmış, sərginin əhəmiyyətini vurğulamışdır.
BDU-nun rektoru, Milli Məclisin deputatı, akademik Abel Məhərrəmov ölkəmizdə təhsil sahəsinə göstərilən dövlət qayğısından danışmışdır.
1919-cu ildə yaradılan Bakı Dövlət Universitetinin inkişaf mərhələlərindən bəhs edən rektor, son illər təhsil müəssisəsindəki nailiyyətləri nəzərə çarpdırmış və bildirmişdir ki, son illər ərzində BDU alimlərinin 1000-dək adda monoqrafiya, dərslik və dərs vəsaitləri nəşr olunmuşdur.
Sonra iştirakçılar sərgi ilə tanış olmuşlar. Burada alimlərin kimya, riyaziyyat, ədəbiyyat, hüquq, fizika və digər elm sahələrinə aid 100-dən çox adda kitabları (onlardan 62 adda kitab BDU-nun nəşriyyatında çap edilmişdir) nümayiş etdirilmişdir.
Bölmənin digər xəbərləri
