SİYASƏT
Bakı şəhər Xəzər rayonunun Mərdəkan qəsəbəsi ilə Polşanın Pruşkuv rayonunun Nadajın qəsəbəsi qardaşlaşmışlar
Bakı, 3 iyul (AZƏRTAC). İyunun 21-dən 27-dək Bakı şəhəri Xəzər rayonunun Mərdəkan və Polşanın Pruşkuv rayonunun Nadajın qəsəbələrinin qardaşlaşması məqsədi ilə Azərbaycan nümayəndə heyəti Polşaya səfər etmişdir.
Azərbaycanın Polşadakı səfirliyindən AZƏRTAC-a bildirmişlər ki, Bakının Xəzər Rayon İcra Hakimiyyətinin başçısı Gülağa İslamovun rəhbərlik etdiyi nümayəndə heyəti Nadajın qəsəbəsinə səfər çərçivəsində bir sıra görüşlər keçirmişdir.
Azərbaycan nümayəndə heyəti Nadajın qəsəbəsindəki İoan Pavel II adını daşıyan gimnaziyada olmuşdur. Onlar gimnaziyanın bacarıqlı şagirdlərin əl işləri ilə tanış olmuş və son illər təhsil ocağının idman sahəsində əldə etdiyi uğurlar haqqında çıxışlarını dinləmişlər.
Gimnaziyanın şagirdləri və müəllimləri qarşısında çıxış edən G.İslamov Azərbaycanda və Bakının Xəzər rayonunda aparılan quruculuq işləri və son illərdə təmir edilmiş, yeni tikilmiş məktəblər haqqında ətraflı məlumat vermişdir.
Nümayəndə heyətinin rəhbəri görüşdə gimnaziya direktoruna İoan Pavel II Bakıya səfərini xatırlatmışdır. G.İslamov bu il həmin səfərin 10 illik yubileyinin qeyd olunmasını və gimnaziyanın İoan Pavel II adını daşımasını nəzərə alaraq təhsil ocağında xatirə lövhəsinin açılmasını təklif etmişdir. Xatirə lövhəsində İoan Pavel II Bakıda səfərdə olduğu zaman Azərbaycan haqqında söylədikləri sözlərinin əks olunmasının məqsədəuyğun olması vurğulanmışdır. Bu təklif gimnaziya rəhbərliyi tərəfindən müsbət qarşılanmışdır.
Nümayəndə heyətinin rəhbəri görüşdə yaxın gələcəkdə Nadajındəki gimnaziyanın Mərdəkan qəsəbəsində müəyyən ediləcək bir məktəb ilə əməkdaşlıq etməsini və hər iki tədris ocağının müəllimlərin və şagirdlərin qarşılıqlı səfərlərin təşkil olunmasını təklif etmişdir. Gimnaziya rəhbərliyi belə bir layihənin Azərbaycanı tanımaq üçün dəyərli olduğunu vurğulamışdır.
Sonda qonaqlar şagirdlərin ifasında maraqlı rəqs nömrələrini izləmişlər.
Həmin gün nümayəndə heyəti Nadajın qəsəbəsində fəaliyyət göstərən yeni açılmış uşaq bağçasında da olmuş və orada tətbiq olunan yeni təhsil-tərbiyə metodları ilə maraqlanmışlar.
Bundan əlavə, nümayəndə heyəti Pruşkuv rayonundakı bir sıra tarixi memarlıq abidələri və polyak bəstəkarı Şopenin ev-muzeyi ilə tanış olmuşlar.
Nümayəndə heyətinə rayonun turizm potensialı və bu sahənin inkişafı istiqamətində görüləcək işlər haqda ətraflı məlumat verilmişdir.
Səfər çərçivəsində Azərbaycan nümayəndə heyəti Nadajın yaxınlığındakı termal sular müalicə mərkəzi ilə tanış olmuşdur.
Nümayəndə heyəti qəsəbənin Yanğın Söndürmə Mərkəzində də olmuşdur. Görüşdə qonaqlara mərkəzin fəaliyyəti haqqında məlumat verilmişdir.
Qonaqlar qəsəbənin mərkəzi parkında da olmuşlar.
Xəzər rayon nümayəndə heyətinin üzvləri parkda yerli əhali ilə söhbət etmiş və onlara ölkəmiz haqqında danışmışlar.
Səfər çərçivəsində Azərbaycan nümayəndə heyəti Nadajın qəsəbəsi parlamentinin iclasında iştirak etmişdir. Nadajın qəsəbəsinin meri Yanuş Gjyb çıxış edərək Azərbaycan və Bakının Xəzər rayonu haqqında iştirakçılara qısa məlumat vermişdir.
G.İslamov iclasda çıxış edərək Nadajın və Mərdəkan qəsəbələrinin qardaşlaşmasının çox sevindirici bir hal olduğunu vurğulamışdır. O, ölkə rəhbərliyi tərəfindən Azərbaycanda aparılan islahatlar nəticəsində əldə edilmiş nailiyyətlərdən danışmışdır.
Nümayəndə heyətinin rəhbəri Azərbaycan Prezidentinin rayona qayğısından və son illər Xəzər rayonunda görülmüş işlər barədə ətraflı məlumat vermişdir. G.İslamov Ermənistanın Azərbaycana qarşı hərbi təcavüzü və bunun nəticəsində 20 faiz torpaqlarımızın zəbt olunması nəticəndə bir milyondan artıq azərbaycanlının qaçqın və məcburi köçkün vəziyyətinə düşdüyünü, onların bir qisminin Xəzər rayonunda məskunlaşmasından danışmışdır.
İclasın sonunda Xəzər rayonunda 2011-2012-ci illərdə görülmüş işlər barədə film nümayiş etdirilmişdir.
Nümayəndə heyəti, həmçinin Varşava şəhərindəki Yakub Yasinski adına 72 saylı liseydə olmuşdur.
Xəzər Rayon İcra Hakimiyyəti tərəfindən lisey rəhbərliyinə Azərbaycan təhsil sistemi haqqında məlumat verilmişdir.
Görüş çərçivəsində nümayəndə heyəti və lisey rəhbərliyi yaxın gələcəkdə Yakub Yasinski adına 72 saylı tədris ocağı ilə Xəzər rayonundakı müəyyən olunacaq məktəbin arasında humanitar fənlər üzrə müəllimlərin mübadiləsinin həyata keçirilməsi barədə razılıq əldə edilmişdir.
Həmin gün Nadajın qəsəbəsi rəhbərliyi tərəfindən Azərbaycan nümayəndə heyətinin şərəfinə ziyafət verilmişdir. Ziyafətdə çıxış edən Nadajın qəsəbəsinin meri cənab Yanuş Gjyb Nadajın ilə Mərdəkanın qardaşlaşmasının Azərbaycan-Polşa əlaqələrinin daha genişləndirilməsi kimi qiymətləndirmişdir.