MƏDƏNİYYƏT
BƏHRAM MANSUROVUN İFASINDA AZƏRBAYCAN MUĞAMLARI YUNESKO XƏTTİ İLƏ BÜTÜN DÜNYAYA YAYILMIŞDIR
Bakı, 12 fevral (AZƏRTAC). Azərbaycanın xalq artisti, görkəmli tarzən Bəhram Mansurov 1911-ci il fevralın 12-də dünyaya göz açmışdır. Musiqi mədəniyyətimizin inkişafında özünəməxsus yeri olan və milli musiqimizi vətənimizin hüdudlarından çox-çox uzaqlarda tanıtmış, öz bənzərsiz ifaçılığı ilə muğam sənətinin yüksək zirvələrini fəth etmiş ustad sənətkarımız Bəhram Mansurovun xatirəsi qədirbilən xalqımız tərəfindən daim böyük hörmət və məhəbbətlə anılmışdır.
Uşaqlıqdan evlərində təşkil olunan musiqi məclislərinin şahidi olan B.Mansurovun musiqiyə sonsuz sevgisi onu daim düşündürmüş və əsl sənətkar kimi yetişməsinə, püxtələşməsinə təkan vermişdir. Bəhram Mansurovun xalq mahnılarımıza, muğamlarımıza olan məhəbbəti tarı köksünə sıxdığı ilk gündən açıq-aşkar hiss edilmişdir. 8 yaşından başlayaraq dərdlərini, arzularını tarla bölüşən Bəhram Mansurovun 19 yaşı olanda Müslüm Maqomayev onu ilk notlu xalq çalğı alətləri orkestrinə, daha sonra isə Opera və Balet Teatrına solist-tarzən kimi dəvət etmişdir. Bəhram Mansurov opera səhnəsində Hüseynqulu Sarabski, Yavər Kələntərli, Hüseynağa Hacıbababəyov, Əlövsət Sadıqov, Həqiqət Rzayeva kimi korifeylərlə işləmişdir. Dövrünün tanınmış ifaçılarından bir çoxunu teatra cəlb edərək onları tamaşalara hazırlamışdır.
Bəhram Mansurov ilk azərbaycanlı musiqiçidir ki, onun ifasında Azərbaycan muğamları YUNESKO xətti ilə vallara və CD-lərə yazılıb, bütün dünyaya yayılmışdır. O, 1978 və 1983-cü illərdə Səmərqənddə keçirilən Beynəlxalq muğam simpoziumunda Azərbaycanı təmsil etmişdir. Bəhram Mansurov Sadıqcandan sonra klassik Azərbaycan muğamlarını qoruyub saxlayan və təbliğ edən yeganə tarzən idi. Onun ifa etdiyi bütün muğamlar, habelə dəraməd, diringə, təsnif və rənglər oğlu, bəstəkar Eldar Mansurov tərəfindən nota salınmışdır.
Unudulmaz sənətkarımız B.Mansurov 1985-ci ildə dünyasını dəyişsə də onun yaratdığı ölməz sənət inciləri bu gün də neçə-neçə gənc tarzənin yetişməsinə təkan verir, yol göstərir.