Bakı, 10 noyabr, AZƏRTAC

2020-ci il noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan arasında imzalanan üçtərəfli Bəyanat Ermənistanın işğalçılıq siyasətinin sonu oldu. Doqquz bənddən ibarət Bəyanat Azərbaycanın şanlı Qələbəsinin təsdiqidir. Otuz il davam edən beynəlxalq riyakarlıq, beynəlxalq hüququn normalarına hörmətsizlik, dünyada başa alıb gedən islamofobiya, ikili standartlar Qarabağ münaqişəsinin güc yolu ilə həllini qaçılmaz etdi. Artıq keçmişdə qalmış Qarabağ münaqişəsinin nizamlanması üçün 1992-ci il martın 24-də təsis olunmuş, hazırda tarixin arxivinə atılmış ATƏT-in Minsk qrupu fəaliyyət göstərdiyi 29 il ərzində problemin həllinə yox, dondurulmasına çalışdı və bunun nəticəsində illər ərzində aparılan danışıqlar nəticəsiz qaldı. Təcavüzkarın bir dəfə də olsun öz adı ilə çağırılmaması, həm işğalçıya, həm də işğala məruz qalmış tərəfə eyni münasibətin bəslənilməsi Ermənistanı daha da həyasızlaşdırdı. Azərbaycan isə daim beynəlxalq hüquqa sadiqliyini nümayiş etdirir və münaqişənin danışıqlar yolu ilə həllinə çalışırdı.

Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.

Ə.Bədəlov vurğulayıb ki, mötəbər beynəlxalq təşkilatlar, xüsusilə BMT Təhlükəsizlik Şurası işğalçı Ermənistana təzyiq göstərməkdə acizlik nümayiş etdirir, tərəfləri sülhə çağıran bəyanatlar verməklə işlərini bitmiş hesab edirdilər. Halbuki, BMT Təhlükəsizlik Şurası Ermənistanın qoşunlarını Azərbaycanın işğal olunmuş ərazilərindən qeyd-şərtsiz çıxarması barədə 4 qətnamə qəbul etmişdi. Bu qətnamələr 27 il kağız üzərində qaldı. Digər ölkələr barəsində qətnamələr qəbul ediləndə BMT Təhlükəsizlik Şurası qarşıya qoyulan vəzifənin dərhal yerinə yetirilməsi ilə bağlı dərhal hərəkətə keçir, tələblər irəli sürürdü. Ancaq belə bir şərt və ya tələb Ermənistan qarşısında qoyulmadı. Bu da işğalçı ölkənin əl-qolunu açdı və ermənilər cəzasızlıq mühitindən yararlanaraq qəddarlıqlarını, mənfur niyyətlərini davam etdirdilər. Son iki il ərzində Ermənistanın təxribatçı addımları, bəyanatları, beynəlxalq hüququn normalarına saymazlığı müharibəni qaçılmaz etdi.

Siyasi şərhçi Ermənistanın sərhədboyu ərazilərdə törətdiyi təxribatlardan və Silahlı Qüvvələrimiz tərəfindən aldığı layiqli cavablardan da söhbət açıb. Bildirib ki, 2016-cı ilin Aprel döyüşlərində rəşadətli Ordumuz dörd gün ərzində işğalçılara necə divan tutdusa, onlar silah-sursatını atıb qaçdılar. Həmin döyüşlərdə Ordumuz 25 il işğal altında qalan ərazilərimizin bir hissəsini, o cümlədən strateji əhəmiyyətli yüksəklikləri azad etdi. İki il sonra - 2018-cı ilin mayında Naxçıvan Muxtar Respublikasında Əlahiddə Ümumqoşun Ordusunun əks-həmlə əməliyyatı nəticəsində ümumilikdə 11 min hektarlıq ərazi işğaldan azad olundu. İki il sonra - 2020-ci ildə baş verən Tovuz əməliyyatı zamanı Azərbaycan Ordusu işğalçılara daha bir ağır zərbə vurdu. Ermənistanın siyasi və hərbi rəhbərliyi bunlardan nəticə çıxarmaq əvəzinə, 2020-ci il sentyabrın 27-də sərhədboyu ərazilərdə genişmiqyaslı təxribatlar törətdi və bunu müharibəyə çevirdi. Cəmi 44 gün davam edən müharibənin hər günü növbəti ərazilərimizin işğaldan azad olunması ilə yekunlaşırdı.

Ə.Bədəlov, həmçinin qeyd edib: “Müharibə başlanan gündən Prezident, Ali Baş Komandan İlham Əliyev xalqa hər müraciətində rəşadətli Ordumuzun irəliləməsinin, yeni ərazilərimizin azad edilməsinin müjdəsini verirdi. Xalqımız artıq hər gün qəlbə müjdəli xəbərlər eşitməyə adət etmişdi. Qəhrəman Ordumuz hər gün irəli gedir, hər gün yeni şəhərlər, kəndlər, qəsəbələr, yüksəkliklər azad edilirdi. Rəşadətli hərbçilərimiz bir amalla vuruşurdu - bu işğala, bu haqsızlığa son qoyulsun, tarixi ədalət zəfər çalsın. Noyabrın 8-də Şuşanın işğaldan azad olunması ilə Ermənistan məğlubiyyətini qəbul etdi və noyabrın 10-da üçtərəfli Bəyanatı imzalamaqla bu məğlubiyyəti rəsmən təsdiqlədi”.

Siyasi şərhçi diqqətə çatdırıb ki, üçtərəfli Bəyanatın imzalanmasından iki il ötsə də, Ermənistan üzərinə götürdüyü öhdəlikləri yerinə yetirmək istəmir və atəşkəsi pozmaqda davam edir. Ermənilər hətta bir sıra hallarda yenidən təxribatlar törətmək istədilər, lakin başları üzərində “Dəmir yumruq” gördülər. Postmüharibə dövründə münasibətlərin tənzimlənməsi istiqamətində Brüsseldə, Praqada və Soçidə keçirilən üçtərəfli və dördtərəfli görüşlərdə Ermənistan rəhbərliyinin bütün cəhdlərinə baxmayaraq, hətta Fransa Prezidenti Emmanuel Makronun dəstəyinə güvənsələr də, onlar istəklərinə nail ola bilmədilər. Bu görüşlərdə Azərbaycanın irəli sürdüyü 5 baza prinsipini Ermənistan da qəbul etmək məcburiyyətində qaldı.

“Hazırda işğaldan azad edilmiş ərazilərdə yenidənqurma, bərpa-quruculuq işləri sürətlə davam etdirilir. Dünyanın bir neçə ölkəsinin iri şirkətləri də bu işlərdə yaxından iştirak edir. Bu, “Qarabağ Azərbaycandır!” reallığının təsdiqidir”, - deyə Ə.Bədəlov vurğulayıb.