Bu gün İranda Ordu Günü qeyd edilir
Tehran, 18 aprel, AZƏRTAC
Bu gün İranda Ordu Günü qeyd edilir. İslam inqilabından sonra təsis olunan Ordu Günü hər il hərbi paradla qeyd edilir.
AZƏRTAC xəbər verir ki, aprelin 18-də (29 fərvərdin) Ordu Günü ilə əlaqədar olaraq Tehranda keçirilən hərbi paradda Prezident Həsən Ruhani çıxış edib. O diqqətə çatdırıb ki, İran ordusu dünyada və bölgədə həmişə terror təşkilatları ilə mübarizə aparıb. İranın güclü silahlı qüvvələrə malik olduğunu bəyan edən H.Ruhani bildirib ki, rəsmi Tehran hər zaman dünyada sülhün və sabitliyin hökm sürməsini istəyir.
Prezident bildirib ki, ABŞ tərəfindən İrana qarşı tətbiq edilən iqtisadi sanksiyalar qanunsuz və beynəlxalq hüquqa zidd olduğu kimi İran İslam İnqilabı Keşikçiləri Korpusunun da terror təşkilatı kimi tanınması bütün beynəlxalq qanunlara ziddir. O vurğulayıb ki, İran parlamenti də qanun qəbul edib və ABŞ-ın Yaxın Şərq regionundakı hərbi hissələrini terrorçu təşkilat kimi tanımağa başlayıb.
Qeyd edək ki, İranın Ali Rəhbəri Ayətullah Əli Xamneyi də bir qrup yüksək rütbəli zabiti qəbul edib. İran Silahlı Qüvvələrinin Ali Baş Komandanı Ə.Xamneyi bəyan edib ki, tarixboyu İrana qarşı hərbi təcavüz etmək istəyənlər daim məğlub olub.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
