İQTİSADİYYAT
Cəlilabad şəhərinin su və kanalizasiya sisteminin yenidən qurulması üzrə 4 istiqamətdə iş aparılır
Cəlilabad, 16 iyul (AZƏRTAC, Bağır Əliyev). İyulun 16-da Cəlilabad Rayon İcra Hakimiyyətində keçirilən geniş şura iclasında bu ilin birinci yarısında sosial-iqtisadi inkişafın yekunları və qarşıda duran vəzifələr müzakirə edildi.
AZƏRTAC xəbər verir ki, yığıncaqda 2014-cü ilin birinci yarısında rayonun iqtisadiyyatında müsbət meyillərin müşahidə olunduğu bildirildi.
Diqqətə çatdırıldı ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nda nəzərdə tutulan sənaye və kənd təsərrüfatının inkişaf etdirilməsi, tikinti-abadlıq işlərinin genişləndirilməsi, elektrik enerjisi, qaz və su təchizatının yaxşılaşdırılması, meliorasiya tədbirlərinin həyata keçirilməsi, təhsil, səhiyyə, mədəniyyət və idman müəssisələrinin əsaslı təmiri və tikintisinin davam etdirilməsi daim diqqət mərkəzində saxlanılıb.
Birinci yarımildə də əvvəlki illərin müsbət ənənələri davam etdirilərək tikinti-abadlıq və quruculuq işlərinə xüsusi diqqət yetirilib.
Hazırda Cəlilabad şəhərində Heydər Əliyev Mərkəzi, Göytəpə şəhərində Ulu Öndərin abidəsinin ucaldılacağı Heydər Əliyev parkı, mədəniyyət mərkəzi, 220 şagird yerlik Məmmədrzalı və 180 şagird yerlik Cəfərli kənd məktəbləri, Muğan kəndində 2 min tonluq soyuducu kamera, Cəlilabad şəhər məscidində mərasim evi tikilir, Cəlilabad Tibb Kollecinin binası əsaslı təmir olunur.
Bundan əlavə, Ələt-Astara magistral yolunun Göytəpə şəhər, Alar və Qarazəncir kəndlərinin ərazisindən keçən hissəsində uzunluğu 15 kilometr olan 34 min kvadratmetrlik hasarlar yenidən qurulur, vətəndaşlara məxsus 400-dən çox darvazalar eyni formalı və müasir görkəmli darvazalarla əvəz edilir.
Cəlilabad şəhərində 3 körpələr evi-uşaq bağçasının, Kövüzbulaq kəndində 360, İncilli kəndində isə 100 şagird yerlik məktəblərin tikintisinə başlanılıb.
Cəlilabad şəhərinin su və kanalizasiya sisteminin yenidən qurulması üzrə 4 istiqamətdə iş aparılır. Altı ay ərzində rayonda 50 kilometr kanalizasiya, 34,5 kilometr su xətti, o cümlədən 1,5 kilometr magistral su xətti çəkilib.
Bu dövrdə kənd yollarının abadlaşdırılmasına da ciddi diqqət yetirilib. Hazırda 23 yaşayış məntəqəsini birləşdirən 21,2 kilometrlik Cəlilabad-Astanlı-Cəngan-Soltankənd, 6 iri yaşayış məntəqəsini əhatə edən 22,4 kilometrlik Alar-Təzəkənd-Üçtəpə-Cəfərxanlı-Əliqasımlı avtomobil yollarının tikintisi davam etdirilir. Əhalini ən çox narahat edən Kazımabad-Göytəpə-Komanlı-Həziabad, Muğan-Maşlıq-Söyüdlü, Xanəgah-Mikayıllı və Təklə-Bayxanlı avtomobil yollarının tikintisi də nəzərdə tutulub.
Bildirildi ki, rayon üzrə 70591 hektar taxıl sahəsinin biçini qısa müddətdə başa çatdırılaraq 95,7 min ton taxıl istehsal olunub. Hesabat dövründə sahələrdən 68,5 min ton kartof, 1,4 min ton tərəvəz, 343 ton bostan məhsulları, 423 ton meyvə yığılıb, 9,2 ton ət, 51,1 ton süd və 15 milyon 314 min ədəd yumurta istehsal olunub. Bu, ötən ilin müvafiq dövründəkindən xeyli çoxdur.
İlin birinci yarısında tikinti-quruculuq işlərinin genişləndirilməsi, sənaye və kənd təsərrüfatının inkişaf etdirilməsi yeni iş yerlərinin açılmasına stimul olub. Bunun nəticəsidir ki, rayonda 466 yeni, o cümlədən 145 daimi iş yeri açılıb.
Çıxış edənlər bu ilin birinci yarısında rayonda sosial-iqtisadi inkişaf sahəsində qazanılan uğurlardan danışıb, işdə yol verilən nöqsanları müzakirə edərək mövcud problemlərlə bağlı təkliflərini bildirdilər.
Şura iclasında müzakirə edilən məsələ ilə bağlı müvafiq qərar qəbul edildi.