CİDDƏDƏ İSLAM İNKİŞAF BANKININ NÖVBƏTİ İLLİK TOPLANTISI KEÇİRİLMİŞDİR
İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, iyunun 3-4-də Səudiyyə Ərəbistanı Krallığının Ciddə şəhərində İslam İnkişaf Bankı (İİB) Qrupunun Müdirlər Şurasının 33-cü İllik Toplantısı keçirilmişdir. Banka üzv olan 56 ölkənin yüksək vəzifəli nümayəndələrinin iştirak etdiyi toplantıya Bəhreynin maliyyə naziri sədrlik etmişdir.
Tədbirdə ölkəmizi İslam İnkişaf Bankında Azərbaycan üzrə müdir, iqtisadi inkişaf naziri Heydər Babayev təmsil etmişdir.
Toplantıda İİB Qrupuna üzv olan təşkilatların - İslam Həmrəylik Fondunun, İslam Ticarət Maliyyə Korporasiyasının, İnvestisiyalar və İxrac Kreditlərinin Sığortalanması üzrə İslam Korporasiyasının, Özəl Sektorun İnkişafı üzrə İslam Korporasiyasının illik hesabatları dinlənilmiş, növbəti illər üçün fəaliyyət istiqamətləri müəyyənləşdirilmişdir.
İclasda təşkilati məsələlərə də baxılmışdır. Tacikistan vətəndaşı Hamadan Taqaymurodov İİB-in D Qrupuna (bu qrupa Orta Asiya ölkələri, Albaniya və Azərbaycan daxildir) icraçı direktor seçilmişdir. Bundan başqa, İİB-in 34-cü İllik Toplantısının Türkmənistanda, 2010-cu ildəki 35-ci İllik Toplantısının isə Bakıda keçirilməsi qərara alınmışdır.
Toplantı çərçivəsində İİB-ə üzv olan müxtəlif ölkələrdə fəaliyyət göstərən və Bankın əməkdaşlıq etdiyi təşkilatların tədbirləri (seminarlar, təqdimatlar, görüşlər) də keçirilmişdir. Eyni zamanda İİB-in İslam bankçılığı, texnologiyaların inkişafı və s. mövzularda elan etdiyi müsabiqə yekunlaşmış, qaliblərə mükafatlar təqdim olunmuşdur.
Səudiyyə Ərəbistanı Krallığına səfəri çərçivəsində Heydər Babayev İİB-in prezidenti Əhməd Məhəmməd Əli ilə də görüşmüş, Bankla əməkdaşlığın genişləndirilməsi perspektivlərini müzakirə etmişdir.
Qeyd edək ki, iyunun 12-də İİB prezidenti Əhməd Məhəmməd Əlinin Bakıya səfəri nəzərdə tutulur. Səfər çərçivəsində Bank rəhbərinin Bakıda keçiriləcək Xəzər Beynəlxalq İnvestisiya Şirkətinin 1-ci İnvestisiya Konfransında iştirak edəcəyi gözlənilir.
