Bakı, 26 oktyabr, AZƏRTAC

İran və Azərbaycan arasındakı münasibətlər ölkəmizin müstəqilliyinin ilk illərindən etibarən heç də bir xətt üzrə inkişaf etməyib. İranda müxtəlif qruplar, ictimaiyyət nümayəndələri, siyasi şərhçilər və s. ölkənin şimal sərhədlərində müstəqil bir Türk dövlətinin yaranmasını təhdid olaraq gördüklərini gizlətməyiblər. Xalqımız 1990-cı illərin əvvəlində işğalçı Ermənistan dövlətinin təcavüzünə uğrayanda İran nə müsəlman Azərbaycan xalqına dəstək oldu, nə də onun ərazi bütövlüyünün müdafiəsinə kömək etdi. Əvəzində məhz Ermənistanın yanında yer aldı. Müxtəlif mənbələrdən verilən məlumata görə, hətta o illərdə İran Ermənistan ordusunun yanacaq təminatına kömək edib. Çox təəssüf ki, bu siyasət hazırda rəsmi Tehran tərəfindən daha açıq və radikal şəkildə davam etdirilir.

Bu fikirləri AZƏRTAC-a açıqlamasında Beynəlxalq Münasibətlərin Təhlili Mərkəzinin (BMTM) şöbə müdiri Vasif Hüseynov söyləyib.

Ekspert qeyd edib ki, Azərbaycan işğaldan azad edilmiş torpaqlarda ikinci hava limanının açılışını etdiyi bu günlərdə İranın xarici işlər naziri Hüseyn Əmir Abdullahiyanın Ermənistana səfəri, Qafan şəhərində İran konsulluğunun açılışını etməsi və səfər ərzində səsləndirilən bəyanatlar rəsmi Tehranın düşmən ölkə və Azərbaycan arasında açıq seçim etməsinin əyani göstəricisi kimi qəbul edilməlidir. “Ermənistanın təhlükəsizliyini İranın təhlükəsizliyi kimi” görən H.Abdullahiyan ondan öncə də ölkəsinin Azərbaycanın cənub sərhədlərində hərbi təlimləri haqqında bəyanat verərək bunun dövlətimizlə bağlı olduğuna açıq işarə vurub.

“Buna paralel olaraq rəsmi Tehran Yerevanla əməkdaşlığı daha da genişləndirmək, Rusiyanın bölgədə zəifləyəcəyi təqdirdə yaranacaq güc vakuumunu doldurmaq və Türkiyə-Azərbaycan müttəfiqlik əlaqələrinə qarşı balans yaratmaq məqsədi güdür. Beləliklə, İran açıq şəkildə minlərlə günahsız müsəlmanın ölümünə bais olmuş, Xocalı soyqırımı kimi dəhşətli qətliam törətmiş və bu siyasətdə xristian birliyinin köməyinə arxalanmış Ermənistana öz qollarını açır.

Tərəflər müxtəlif sahələrdə əməkdaşlığın genişləndirilməsi planları qurur. Ticarət dövriyyəsinin indiki 700 milyon dollar həcmindən 3 milyard dollara çatdırılması, İran tərəfindən Ermənistanın kamikadze dronlarla təchizatı, nəqliyyat sahəsində əməkdaşlığın dərinləşdirilməsi və s. kimi planlar üzərində işlər görülür. Səfəri ərzində H.Abdullahiyan bunu birmənalı olaraq bildirdi ki, “Biz Ermənistanı Şimal-Cənub mühüm tranzit marşrutlarından biri hesab edirik. Bu tranzit marşrutunu gücləndirmək, genişləndirmək və bu marşrut üzrə yük maşınlarının və sərnişinlərin hərəkətini sürətləndirmək üçün Ermənistanla maksimum əməkdaşlıq edəcəyik”.

Vasif Hüseynov əlavə edib ki, iki dövlət arasında bu münasibətlərdən çıxarılacaq nəticə aydındır. Rəsmi Tehran Ermənistanın siyasi-iqtisadi varlığının davam etdirilməsi və onun gücləndirilməsi üçün çalışır. Həmçinin 44 günlük müharibədən sonra rəsmi Yerevanın düşdüyü acınacaqlı siyasi-iqtisadi və hərbi vəziyyəti İran təhdid olaraq görür. Ermənistanın bu böhran bataqlığında batmaması, onun ölkəmizə qarşı təhdid kimi qalması və beləliklə, Azərbaycan-Türkiyə birliyinə qarşı təhlükəsizlik çağırışı kimi var olması üçün çalışır.