AZƏRTAC xəbər verir ki, oktyabrın 20-də Kitab Klubunda Fazil Qaraoğlunun “Ermənilər və həqiqətlər (rəsmi sənədlərlə)” kitabının təqdimat mərasimi keçirilmişdir.

Tədbirin aparıcısı, tarix elmləri doktoru, BDU-nun professoru Elmira Muradəliyeva kitabın aktual cəhətləri barədə danışmışdır.

Sonra tarix elmləri doktoru Süleyman Əliyarlı kitab və “erməniçilik” ideologiyası barədə geniş məlumat verərək, belə bir tədqiqat əsərini ərsəyə gətirdiyini görə müəllifə təşəkkürünü bildirmişdir.

Kitabın baş redaktoru Əlövsət Əmirbəyli nəşrdə toplanan rəsmi sənədlər barədə danışmışdır.

Kitab Klubunun direktoru Elxan Rzayev və əməkdaşı Fazil Kərimli də bu tədqiqat əsərinin aktuallığını, onun bir neçə dilə tərcümə edilib yayılmasının vacibliyini qeyd etmişlər.

Tarixçi alim İrşad İbrahimov “Böyük Ermənistan” xülyaları ilə bağlı öz fikirlərini söyləmişdir.

Natiqlər qeyd etmişlər ki, dünyada türk-erməni münasibətlərinə dair aparılan araşdırmaların ətraflı öyrənilməsi mühüm məsələlərdən biridir. Fazil Oaraoğlunun “Ermənilər və həqiqətlər” kitabı məhz bu səpkidə yazılmış əhəmiyyətli bir əsərdir. Kitabda 350 adlı qaynaq və elmi əsərlərdən istifadə olunmuşdur. Bunların sırasında ermənilər tərəfindən yazılan əsərlərin təhlili mühüm yer tutur. Müəllif ermənilərin tarixi proseslərə qeyri-elmi baxışların, mövqelərinin qeyri-obyektiv olmasını sübuta yetirmişdir.

Eyni zamanda kitabda, Türkiyə Respublikasınınn arxiv sənədlərindən geniş istifadə olunmasının Azərbaycan tarixşünaslığı üçün böyük maraq kəsb etdiyi bildirilmişdir. Tədqiqat əsərində erməni komitələrinin yaranması və fəaliyyəti, onların Türkiyənin Van vilayətində törətdikləri qanlı hadisələr, Zerə faciəsi, Bitlis ve Muş vilayətlərində ermənilər tərəfindən həyata keçirilən qətliamlar və 1918-1920-ci illərdə xain qonşularımızın Azərbaycanda reallaşdırdıqları soyqırımlar rəsmi sənədlər əsasında açıqlanmışdır.