Metroda sərnişinin halının pisləşməsi qatarın hərəkətində gecikməyə səbəb olub
Bakı, 15 may, AZƏRTAC
Bakı metrosunun yaşıl xətti üzrə “Nizami” stansiyasından “28 May” stansiyası istiqamətində hərəkətə başlayan qatarın maşinistinə salonda bir sərnişinin halının pisləşməsi barədə məlumat verilib və qatarın dayandırılması tələb olunub.
“Bakı Metropoliteni” QSC-dən AZƏRTAC-a bildirilib ki, maşinist qatarı təcili dayandırıb. Sərnişinlər vaqonun qapılarının “qəza-açma kranı”ndan istifadə edərək, sərnişini platformaya çıxarıblar.
Maşinist məcburi qaydada sonuncu vaqona qədər gedərək, “qəza-açma kranı”nı yerinə qaytarıb və kabinəyə dönərək hərəkəti bərpa edib.
Nəticədə, 10 dəqiqə yubanma yaranıb. Hazırda yubanmanın aradan qaldırılması istiqamətində operativ tədbirlər görülür.
Halı pisləşən xanıma "Nizami" stansiyasında dərhal ilkin yardım göstərilib və təcili tibbi yardım xidməti çağırılıb. Tibbi yardım göstərildikdən sonra o, təşəkkürünü bildirərək, yanında olan ailə üzvü ilə birlikdə yoluna davam edib.
Bölmənin digər xəbərləri
