Ermənistan sülh sazişindən niyə imtina edir? ŞƏRH
Bakı, 4 sentyabr, AZƏRTAC
Ermənistan son günlər həm siyasi, həm də diplomatik olaraq Azərbaycanla sülh gündəliyini davam etdirməyəcəyinə dair israrlı bəyanatlar verir. Eyni zamanda, regionda bunu təsdiqləyən təxribatlarını da davam etdirir. Son Brüssel görüşündən sonra erməni siyasi hakimiyyəti vəziyyəti özlərinin xeyrinə dəyişmək üçün bütün təxribat formalarından istifadə edir. Fransanın dəstəyi və birbaşa müşayiəti ilə Hindistandan İran vasitəsilə Ermənistana idxal edilən uzaqmənzilli silahlar son iki gündə Azərbaycanla şərti dövlət sərhədində istifadə edildi. Həmçinin İranın PUA-ları da son Kəlbəcər təxribatında Azərbaycan havalarında pərvaz edərək bizə qarşı istifadə olundu. Bütün bunlar Fransa və İranın Azərbaycanın sülh gündəliyinə və bölgənin təhlükəsizlik arxitekturasına birbaşa hədələri kimi qiymətləndirilməlidir.
Bu sözləri AZƏRTAC-a açıqlamasında politoloq Amid Əliyev söyləyib.
“BMT Təhlükəsizlik Şurasında (TŞ) keçirilən anti-Azərbaycan şousunda məğlub olan Ermənistan, siyasi ambisiyalarına çatmayan Fransa son hədd kimi Azərbaycanı yeni təxribatlara sövq etmək və bununla da ölkəmizin sülhpərvər imicinə xələl gətirmək yolunu seçdilər. Onlar bununla da iki ildən çox davam edən sülh prosesini tamamilə dondurmaq, məsələnin həll olunması istiqamətini Moskva və ya Paris müstəvisi ilə uzlaşmasını istədilər. Nikol Paşinyan hakimiyyəti isə ikiillik danışıqlarda əldə edilmiş razılıqların üstündən tamamilə xətt çəkməyə qədər gedə biləcək addımlar atdı. Belə ki, bölgəyə qanunsuz olaraq hərbi sursatın daşınması, silahlı təxribatlar, Qarabağ separatçılarına maliyyə dəstəyinin göstərilməsi kimi faktlar bunları deməyə əsas verir. Bölgəyə silah daşımaqla sülh prosesini tormozlayan erməni siyasi hakimiyyəti, həm də vaxt qazanmaqla Azərbaycana qarşı yeni təxribatlarla zərbə vuraraq növbəti danışıqlar raundunda əlini gücləndirmək istəyir. Başlanmış feyk humanitar fəlakət şousu da bu planın bir hissəsidir. Fransa və İranın Ermənistana dəstəyi isə situasiyaya uyğun olaraq yalnız və yalnız merkantilist xarakter daşıyır. Son həddə nə Fransa, nə də İran Azərbaycana qarşı real olaraq yerdə müharibə aparmayacaq”, - deyə politoloq bildirib.
Onun sözlərinə görə, Nikol Paşinyanın sentyabrın 2-də söylədiyi fikirlər, eləcə də separatçıları dəstəkləməsi bir daha onu deməyə əsas verir ki, ilin axırına kimi verilmiş möhlətdə Ermənistan sülh sazişini imzalamaqda maraqlı deyil. Bu prosesdə həm də erməniyönümlü dövlətlər də maraqlıdır. Fransa, İran, Rusiya, Kanada, Hindistan və hətta Lixtenşteyn də bu sıralarda birinciliyi əldən vermək istəmirlər.
Bütün qeyd olunan faktlar fonunda Azərbaycan bölgədə sülhün qorunması və təhlükəsizliyin təmin olunması istiqamətində son ana kimi diplomatik və siyasi yollardan, daha doğrusu təzyiq vasitələrindən istifadə edəcək. Qarabağda yaşayan ermənilərin Ermənistanla bütün növ kommunikasiyaları kəsilməli və tam şəkildə təminat Azərbaycan tərəfindən icra edilməlidir. Bununla yanaşı, Azərbaycan dövləti hər zaman separatçılara qarşı real hərbi güc tətbiq etmə hüququnu da özündə saxlayır və bundan istifadə etmək kimi legitim və müstəsna ixtiyara da sahibdir.
Bölmənin digər xəbərləri
