Bakı, 4 sentyabr, AZƏRTAC

Son vaxtlar Ermənistanın Azərbaycanla sərhəddə xislətlərinə uyğun şəkildə əməllər törətməsi, yeni müharibə ocağı alovlandırma cəhdləri təəccüblü deyil. Təxribatçı əməllərin sentyabrda aktivləşməsini isə təsadüfə bağlamaq olmaz. Böyük ehtimal ki, özlərinin məğlubedilməzlik mifinin Azərbaycan Ordusu tərəfindən ifşa olunduğu Şanlı 44 günün başlanğıcı məhz sentyabr olduğundan onlar bu ayı revanş ayı kimi hədəfləyiblər.

Bu barədə AZƏRTAC-a açıqlamasında “Xüsusi Təyinatlıların Qaziləri, Şəhid Ailələri və Veteranları” İctimai Birliyinin sədri Bəhruz Məmmədzadə söyləyib.

Onun sözlərinə görə, Azərbaycanın Ermənistana qarşı nümayiş etdirdiyi humanist fəaliyyətinə və Xankəndində yaşayan ermənilərə yardım göndərməsinə baxmayaraq, qarşı tərəf bölgədə vəziyyəti gərginləşdirməklə sülh danışıqlarından yayınmağa çalışır və artilleriya qurğularından, PUA-lardan bölmələrimizə hücum etməklə təxribatçı fəaliyyətlərini davam etdirir. Bununla da bütün dünyanın diqqətini bölgəyə cəlb etməklə prosesi uzadır.

B.Məmmədzadə fikirlərinə davam edərək deyib: “Ermənistan öz havadarlarına güvənib belə təxribatçı əməllər törətməklə bir neçə hərbi qulluqçusunu itirdi. Azərbaycan Ordusunun gücünə bələd olan ölkənin kiməsə arxayın olub bu kimi gülünc əməllərə əl atması başadüşülən deyil. Görünür ki, kimsə onları şirin vədlərlə aldadır, öz planını həyata keçirmək üçün Ermənistanı oyuncaq kimi istifadə edir. Ən gülməlisi isə, Ermənistanın həm təxribat törətməsi, həm də dezinformasiya yaymasıdır. Belə deyim var: Həm günahkar, həm də güclü. Naxələf qonşularımız özlərinin əməllərinə don geyindirmək, onları ört-basdır etmək üçün saxta məlumatlar yayır, guya ordumuzun bölmələrinin onları atəşə tutduğu, hətta mülki əhalinin təhlükədə olduğu barədə dünyaya car çəkirlər. Onlara inanan da, səslərinə səs verən də öz məqsədləri naminə ermənilərdən istifadə edən havadarlarıdır.

Azərbaycan Ordusu hər dəfə onların həmin təxribatlarına artıqlaması ilə cavab verir, həmişəki kimi suları süzülə-süzülə yerlərində oturmalı olurlar. Ermənistanın hərbi-siyasi rəhbərliyi, o cümlədən revanşist qüvvələr və havadarları bir daha bilməlidirlər ki, Azərbaycanın müasir silahla, təchizatla təmin olunmuş və Zəfər qazanmış güclü ordusu var. Silahlı Qüvvələrimizin hərbi qulluqçuları ərazi bütövlüyümüzü qorumağa qadirdir. 44 gündə işğaldan azad etdiyimiz Azərbaycan ərazisində hələ də terrorçu fəaliyyəti göstərən erməni separatçılarını öz şəhər və kəndlərimizdən təmizləmə vaxtı gəlib. Bu bizim haqqımızdır! Ermənistan bu cür təxribatlarla, sadəcə, özü üçün növbəti qara tarixi və sonluğu gətirəcək”.