İQTİSADİYYAT
“Əşrəfi”, “Dan Ulduzu” və “Aypara”nın kəşfiyyatı, işlənməsi və hasilatı üzrə saziş ratifikasiya olunub
![“Əşrəfi”, “Dan Ulduzu” və “Aypara”nın kəşfiyyatı, işlənməsi və hasilatı üzrə saziş ratifikasiya olunub](/files/2018/2/1200x630/15302707661678730096_1200x630.jpg)
Bakı, 29 iyun, AZƏRTAC
“Əşrəfi”, “Dan Ulduzu” və “Aypara” sahəsinin kəşfiyyatı, işlənməsi və hasilatına dair saziş ratifikasiya olunub.
AZƏRTAC xəbər verir ki, Milli Məclis iyunun 29-da “Xəzər dənizinin Azərbaycan sektorunda Əşrəfi-Dan Ulduzu-Aypara sahəsinin kəşfiyyatı, işlənməsi və hasilatın pay bölgüsü” (HPBS) haqqında sazişi ratifikasiya edib.
Xatırladaq ki, mayın 30-da Bakıda SOCAR ilə Norveçin “Equinor” (əvvəlki “Statoil”) qrupunun bir hissəsi olan “Statoil Azərbaycan” şirkəti “Xəzər dənizinin Azərbaycan sektorunda Əşrəfi-Dan Ulduzu-Aypara sahəsinin kəşfiyyatı, işlənməsi və hasilatın pay bölgüsü” haqqında saziş imzalayıb. Saziş SOCAR-ın prezidenti Rövnəq Abdullayev və “Equinor” qrupun yataqların kəşfiyyatı üzrə icraçı vitse-prezidenti Tim Dodson tərəfindən imzalanıb.
Saziş çərçivəsində seysmik kəşfiyyat işlərinin yerinə yetirilməsi və ilk kəşfiyyat quyusunun qazılması nəzərdə tutulur. Layihənin icrası üçün “Equinor” və SOCAR tərəfindən 50-50 birgə əməliyyat şirkəti yaradılacaq.
“Dan Ulduzu” və “Əşrəfi” perspektiv strukturları Xəzər dənizində, Bakıdan şimal-şərqə doğru 100-110 kilometr məsafədə yerləşir. Burada dənizin dərinliyi 80-180 metrdir. “Aypara” sahəsi Bakıdan 90 kilometr şimal-şərqdə, açıq dənizdə yerləşir, 1980-ci ildə seysmik kəşfiyyat işləri nəticəsində aşkar olunub.