FHN: Pirşağıda “Gilavar” sanatoriyasında baş verən yanğın söndürülüb
Bakı, 3 aprel, AZƏRTAC
Fövqəladə Hallar Nazirliyi (FHN) Sabunçu rayonunun Pirşağı qəsəbəsində yerləşən “Gilavar” sanatoriyasının ərazisində (hazırda fəaliyyət göstərmir) baş verən yanğınla bağlı məlumat yayıb.
FHN-dən AZƏRTAC-a bildiriblər ki, yanğın “Gilavar” sanatoriyasının ərazisində məcburi köçkünlərin məskunlaşdığı üçmərtəbəli korpusda baş verib. Nəticədə korpusun birinci mərtəbəsində ümumi sahəsi 42 kvadratmetr olan iki otaq və dəhliz, binaya bitişik tikilmiş ümumi sahəsi 18 kvadratmetr olan köməkçi tikili və zirzəmiyə yığılmış məişət əşyaları yanıb. Yanğın zamanı yuxarı mərtəbələrdəki tüstülənmiş otaqlardan 55 sakin FHN-in müvafiq xilasetmə qüvvələri tərəfindən təxliyə edilib. Bina yanğından mühafizə olunub. Alov yanğın bölmələri tərəfindən söndürülüb.
Hadisə ilə bağlı müvafiq qurumlar tərəfindən araşdırma aparılır.
Bölmənin digər xəbərləri
