İDMAN
Fidanın qızıl medalı
Bakı, 27 noyabr, AZƏRTAC
Gənc azərbaycanlı Fidan Seyidova ilə macar Aknai Borokidən ibarət duet bu həftə bədii gimnastika üzrə Macarıstan Kuboku yarışlarında 12 yaşa qədər gimnastların qrupunda qızıl mükafat qazanıb. On iki ölkənin nümayəndələrindən ibarət hakimlər kollegiyası ən yüksək balları tərəddüd etmədən bu gözəl cütlüyə verib. Cütlük ev sahibləri ilə bərabər, müxtəlif ölkələrdən, o cümlədən Avstriya, Sloveniya, Slovakiya və Çexiyadan olan idmançıları geridə qoyub.
Xatırladaq ki, bu, həmvətənimizin yeganə qızıl medalı deyil. Ötən il Fidanın və onun kiçik bacısı Nərminin iştirak etdiyi komanda elə debüt çıxışında Macarıstan Kubokunu qazanıb.
Fidanın xoşbəxt valideynlərinin - AZƏRTAC-ın xüsusi müxbirləri Vüqar Seyidovun və Pərvanə Qarayevanın qızları ilə fəxr etmək üçün hər cür əsasları var. Gənc həmvətənimiz nəticələr elan olunandan dərhal sonra etiraf edib ki, qızıl medal almaq üçün Avropa podiumlarının ən yüksək pilləsinə məhz azərbaycanlının qalxması onu daha çox sevindirir. O, öz çıxışını və qələbəsini gələn il Bakıda keçiriləcək Birinci Avropa Oyunlarına həsr edib.
Macarıstan Kubokunun sahibi AZƏRTAC vasitəsilə Azərbaycan idmançılarına bu oyunlarda müvəffəqiyyətlə çıxış etməyi arzulayıb.