Bakı, 16 noyabr, AZƏRTAC

1987-ci ilin oktyabrında Abel Aqanbekyanın bədnam bəyanatı ərazi iddiasının start atəşinə çevrilmişdi. Üzərindən əsrin dörddə birinə qədər vaxt keçib, lakin o vaxt sovetlərin dağılmasına hesablanan və ermənilərin fitvası ilə başlanan müharibə qərarı eyni dalğa və şifrədə Fransa Senatının dünən qəbul etdiyi antiazərbaycan qətnaməsi ilə ahəngdarlıq təşkil edir.

Bu fikirlər Sosial Tədqiqatlar Mərkəzinin(STM) İdarə Heyətinin üzvü, Daxili Siyasətin Təhlili Departamentinin müdiri professor Tahirə Allahyarovanın “Fransanın Azərbaycana siyasi hücumu - təşkilatçılar və məqsədlər” sərlövhəli məqaləsində yer alıb. AZƏRTAC məqaləni təqdim edir.

Fransanın Azərbaycana siyasi hücumu-təşkilatçılar və məqsədlər

Dünya erməniliyi və himayədarları revanşizm siyasəti yönündə Azərbaycanın Qalib imicinə zərbə vurmaq, sülh danışıqlarını qeyri-müəyyən vaxta qədər uzatmaq, “Üçüncü Qarabağ savaşı” narrativləri ilə ölkə daxilində sabitliyə təsir etmək məqsədilə planlar həyata keçirməkdədir. Burada başlıca silah kimi 44 günlük müharibənin Zəfər xronikası, dövlətimizin nəhəng geosiyasi layihələrinin işə salınması, yaxud sülh danışıqlarının ərəfəsi olan xüsusi siyasi təqvimlərdə idarə edilən total və aqressiv dezinformasiya hücumu tətbiq edilir.

AŞPA-da və Avropa Parlamentində, üzv ölkələrin siyasi partiyalarında, xüsusilə də Belçika və Fransanın inzibati-bürokratik idarəçilik sistemində vəzifələrə yerləşməklə qlobal şəbəkə formalaşdırılıb. Bu şəbəkəyə postmüharibə dövründə bütün mümkün yollarla yeni üzvlər cəlb edilir. Əsas məqsəd yenilik - Azərbaycana qarşı atılan addımlarda müxtəlif adlar, təşkilatlar arxasında daha dərindən maskalanmaq, dezinformasiyaya “obyektivlik” görüntüsü vermək üçün riyakarlığı maksimum həddə yüksəltmək, ifşa edilmək imkanlarını minimuma endirməkdir.

Boqosyanlar ailəsinin üzvü Rafael Qluksman və şəbəkəsi iş başındadır

“Avropa Parlamentində siyasi korrupsiyalı deputat şəbəkəsi” postmüharibə dövründə bu şəbəkənin başında duran yeni ad Rafael Qluksmandandır. Qluksmanın adı mediada “10 ildə 3 inqilab edən adam” (2 Ukrayna Maydanı və 1 Gürcüstan inqilabı) kimi tirajlanır. 15 il Ukrayna və Gürcüstanda “töhfə” verdiyi inqilablardan sonra bu ölkələrdə yüksək siyasi dövlət vəzifələri tutan Qluksman 5 il əvvəl Fransaya qayıdıb. Siyasi planların bir hissəsi kimi növbəti dəfə ailə qurub(əvvəlki həyat yoldaşı Saakaşvili hökumətinin daxili işlər naziri Eka Zquladze olub.). Bu dəfəki həyat yoldaşı Leo Salameo (Hala Salameh) Livanın keçmiş mədəniyyət naziri, BMT-nin sabiq baş katibi Kofi Annanın xüsusi müşaviri Hassan Salamehin və erməni Meri Boqosyanın qızıdır. Meri Boqosyan dünyada brilyant maqnatı kimi tanınmış, Brüssel və bütün Qərbdə geniş biznes və siyasi şəbəkəyə malik Jan, Kristian, Albert və Ralf Boqosyan ailəsinin üzvüdür.

“Üç inqilab müəllifi”, heç bir siyasi partiya üzvü olmayan Rafael Qluksman Avropa Parlamentinə sonuncu seçkilərdə “Daşnaksütyun”la tərəfdaşlıq sazişi olan Fransa Sosialist Partiyasının siyahısı ilə “salınıb”. Deputat seçilən kimi “Avropa İttifaqında Demokratik Proseslərə Xarici müdaxilə və Dezinformasiya üzrə Xüsusi Komissiya”nın təsisçisi və prezidenti olur. (Special Committee on Foreign Interference in all Democratic Processes in the European Union, including Disinformation)(İMGE). Komissiyada:1 prezidenti, 19 üzvü (5 Büro üzvü:7 koordinatoru, 7 məruzəçisi -6 kölgə/gizli məruzəçi) hamı Azərbaycana qarşı şəbəkə yaradan “ağır çəkili” ermənipərəstlər səfərbər olub.

“Dezinformasiya Komitəsi” Rafaelin rəhbəri olduğu davamlı genişləndirdiyi şəbəkəyə xidmət edir və tezliklə “bəhrəsini” verir. 2022-ci ilin əvvəlindən Avroparlamentdə ölkəmizə qarşı intensiv dezinformasiya fəallığı pik həddə çatır. Bu Komissiyanın təklifi ilə fevralın 8-də Avroparlamentin İnsan Hüquqları üzrə Alt Komitəsi birgə iclasda “Azərbaycanda insan hüquqları pozuntuları və Bakının Aİ-nin siyasətinə müdaxiləsi” mövzusunda xaricdəki blogerlərin iştirakı ilə müzakirə keçirir. 1 ay sonra isə 2022-ci il martın 11-də isə cəmiyyətimizdə son dərəcə hiddət doğuran "Dağlıq Qarabağda mədəni irsin məhv edilməsi haqqında” qondarma qətnamə qəbul edilir.

R.Qluksman son iki ayda informasiya hücumunun şiddətlənməsində baş fiqur kimi: xronika, faktlar

Vətən müharibəsinin Zəfər təqviminin ikinci ildönümü ərəfəsində, Ukrayna müharibəsi və qlobal enerji böhranı fonunda Azərbaycana geosiyasi marağın yüksəlişinə qarşı əks-tədbirlər planı, növbəti dezinformasiya ssenariləri hazırlanır. “Təxribat-cavab əməliyyatları-saxta xəbərlər-informasiya hücumu” formulu işə salınır və oktyabr ayı demək olar ki, Avropa siyasətçilərinin ölkəmizə qarşı təzyiqləri işarəsi altında başlayır. Oktyabrın əvvəlində “hərbi əsirlər videosu” media məkanına atılır, bütün Qərb mediası bir səslə erməni versiyasını tirajlayır. Prosesə daxildəki 5-ci kalon da qoşulur. Avropa Şurasının Baş katibi Mariya Peyçinoviç Buriç video ilə bağlı ətraflı məlumat verilməsini, Avropa Parlamentində Rafaelin Komissiya üzvü, Makronun partiyadaşı, məlum Valeri Pekresin həmkarı olan Fransua Ksavye Bellaminin təşəbbüsü ilə bəzi deputatlar Azərbaycana qarşı sanksiyalar, ali komissar Cosef Borreldən qaz müqaviləsini də dayandırmağı tələb edən müzakirələr açırlar.

Oktyabrın 11-də AŞPA-nın məlum Komitəsində "Azərbaycanda jurnalistlərin və hüquq müdafiəçilərinin həyatına və təhlükəsizliyinə təhdidlər" mövzusu müzakirə edilir. Son 30 ildə ilk dəfə ingiltərəli deputat Hanna Bardell bu sahədə Azərbaycan üzrə hesabat hazırlamaq üçün məruzəçi təyin olunur.

Cari ilin oktyabrın 10-14-də ATƏT PA-nın payız sessiyasında “Ermənistan və Azərbaycan arasında hərbi əməliyyatlar, o cümlədən yaşayış məntəqələrinə və mülki infrastruktura hücumlar” mövzusunda müzakirələr keçirilir.

Oktyabrın 10-da Fransanın Avropa və Xarici İşlər Naziri Ketrin Kolonna “France Inter” telekanalına müsahibəsində “Fransa Ermənistanla bağlı susmur. Biz Ermənistanı dəstəkləyirik” açıqlamasını verir.

Avropa Şurasının Monitorinq komitəsi Norveç Əmək Partiyasından Liz Kristofersonu Azərbaycan üzrə (Ştefan Şennakdan sonra) yeni həmməruzəçi təyin edir. Azərbaycanda demokratiya, insan haqları, korrupsiya, seçki sahəsində baş verəcək bütün proseslərin monitorinqi üçün 5 illik mandat verir.

2022-ci il oktyabrın 12-də dezinformasiya hücumunun pik nöqtəsini E.Makronun “France 2” telekanalına hiddət doğuran müsahibəsi təşkil edilir. Oktyabrın 26-da Makronun müsahibəsinin davamı-2-ci hissəsi olacaq və növbəti hücumlar istisna deyil.