GENİŞ ÜRƏKLİ MANASIN İŞIQLI SƏRİNLİYİ
AZƏRTAC xəbər verir ki, iyunun 6-da Azərbaycan kinoteatrında “Şərq-Qərb” X Beynəlxalq Bakı kinofestivalı çərçivəsində “İşıqlı sərinlik” (ssenari müəllifi və quruluşçu rejissor Ernest Abdıjaparov) filmi nümayiş etdirilmişdir. E.Abdıjaparovun filmi şəhərli qız Asemin və kəndli oğlan Muradın bir qədər kədərli, eyni zamanda, məzəli məhəbbət macərasıdır. Onlar bir-birini sevir və evlənməyə hazırlaşırlar. Murad sevgilisini valideynləri ilə tanış etmək üçün İssık-kula aparır. Lakin hadisələr onların birgə həyat qurmaq planını kökündən dəyişir.
Filmdə Asem Toktobekova, Siyezdbek İskenaliyev, Tınçtık Abulkasımov, Elnura Osmonəliyeva çəkilmişlər. “İşıqlı sərinlik” filmi bir çox beynəlxalq mükafatların, o cümlədən “Avrasiya-4” və “Kotbus-2007” mükafatlarının laureatı, habelə “Nika-2008” müsabiqəsinin nominantı olmuşdur.
E.Abdıjaparov yaradıcılıq fəaliyyətinə 1988-ci ildə “Qırğızfilm” kinostudiyasında inzibatçı, redaktor, rejissor asissenti kimi başlamışdır. O, 2007-ci ildə Qırğızıstanda “Kinematoqraf” nominasiyasında ilin adamı elan olunmuş və “Geniş ürəkli Manas” heykəlciyini almışdır.
Aktrisa Asem Toktobekova tamaşaçılar qarşısında çıxış edərək bildirmişdir ki, “İşıqlı sərinlik” filmi qısa müddətdə Qırğızıstanda elə şöhrət qazanmışdır ki, hətta yeni doğulan qızların adını Asem qoyurlar.
######
Bölmənin digər xəbərləri
