CƏMİYYƏT
Hicran Hüseynova: Zorakılığın aradan qaldırılması Azərbaycan hökumətinin prioritetlərindəndir
![Hicran Hüseynova: Zorakılığın aradan qaldırılması Azərbaycan hökumətinin prioritetlərindəndir](/files/2019/3/1200x630/1574672372273677333_1200x630.jpg)
Bakı, 25 noyabr, AZƏRTAC
Noyabrın 25-də Ailə, Qadın və Uşaq Problemləri üzrə Dövlət Komitəsinin BMT ilə birgə həyata keçirəcəyi “Qadınlara və qızlara qarşı zorakılığa son qoyaq” adlı 16 günlük fəallıq kampaniyasına həsr olunmuş dəyirmi masa keçirilib. Kampaniya 25 noyabr - Beynəlxalq Qadınlara Qarşı Zorakılığın Aradan Qaldırılması Günündən başlayaraq 10 dekabr - İnsan Hüquqları Gününədək davam edəcək. Kampaniyanın məqsədi gender əsaslı zorakılığın insan hüquqlarının pozulması kimi təbliği üçün yerli, milli, regional və beynəlxalq səviyyələrdə maarifləndirmə aparmaqdır.
AZƏRTAC xəbər verir ki, Ailə Qadın və Uşaq Problemləri üzrə Dövlət Komitəsinin sədri Hicran Hüseynova dəyirmi masada çıxış edərək qadınlara qarşı zorakılığın müasir dövrün qlobal problemlərindən biri olduğunu bildirib. O deyib: “Aparılan araşdırmalar nəticəsində məlum olub ki, hər üç qadından biri nə vaxtsa zorakılığa məruz qalıb. Dünyada hər üç dəqiqədə ən azı bir qadın öldürülür. Gender əsaslı zorakılığın qarşısının alınmasında bütün ölkələr dövlət səviyyəsində iş aparır, mühüm qərarlar qəbul edirlər. 1999-cu ildə BMT Baş Assambleyası noyabrın 25-ni Qadınlara Münasibətdə Zorakılığın Aradan Qaldırılması uğrunda Beynəlxalq Mübarizə Günü elan edib. Bu gün həmin tarixin 20 ili tamam olur.
İnsan hüquq və azadlıqlarının müdafiəsi, bütün zorakılıq hallarının aradan qaldırılması, eləcə də qadınların öz hüquqlarını bilmələri, onların fəallığının artırılması Azərbaycan hökumətinin prioritetlərindəndir. Hətta ölkəmizin ən ağır ictimai-siyasi və hərbi vəziyyətində belə qadın və uşaq hüquqlarının müdafiəsi hər zaman ön planda olub. Ölkəmiz müstəqilliyini bərpa etdikdən sonra gender bərabərliyi və qadın hüquqlarına dair beynəlxalq normalara riayət olunması ilə bağlı öz üzərinə bir sıra öhdəliklər götürüb. Prezident İlham Əliyevin rəhbərliyi və dəstəyi ilə insan hüquqlarının müdafiəsi sahəsində aparılan islahatların davamı olaraq 2010-cu ildə “Məişət zorakılığının qarşısının alınması haqqında” Qanun qəbul edilib. Qadın hüquqlarının qorunması, xüsusilə də məişət zorakılığının qarşısının alınması sahəsində güclü qanunvericilik bazası yaradılıb”.
Dünyanın bir çox ölkələrində qadınlara qarşı zorakılığın öyrənilməsi və aradan qaldırılması istiqamətində ciddi tədbirlərin görüldüyünü bildirən Hicran Hüseynova Azərbaycanda da zorakılıq hallarının araşdırıldığını, belə halların qarşısının alınması istiqamətində davamlı işin aparıldığını qeyd edib.
“Rayonlarda, kəndlərdə elə həssas ailələr var ki, onlarda ciddi problemlər, faciələr baş verdikdən sonra dövlət qurumları xəbər tuturlar. Belə ailələr arasında radikal dini təriqətlərin təsirinə məruz qalanlar da az deyil. Biz çox vaxt nəticə ilə mübarizə aparırıq. Halbuki vaxtında həmin ailələrdə profilaktik iş aparılsaydı, ağır hallar baş verməzdi. Elə həmin məqsədlə hər bir icra hakimiyyəti yanında gender zorakılığı və uşaqlara qarşı zorakılıq üzrə monitorinq qrupları yaradılıb. Mütəmadi olaraq monitorinq qruplarının fəaliyyəti qiymətləndirilir, bu sahədə çətinliklər müəyyən edilir, təlim və seminarlar keçirilir. Bütün bunlar həmin monitorinq qruplarının işinin daha da təkmilləşdirilməsinə xidmət edir.
Məişət zorakılığı üzrə Məlumat Bankına yığılan məlumatların təhlili də göstərir ki, ailədə baş verən zorakılıq haqqında vəziyyətin ən son həddində polis və ya digər orqanlara məlumat verilir. Əgər uşaqlar evdə zorakılığa şahid olursa, zorakılığın təsiri eyni dərəcədə onun sağlamlıq və inkişafına da zərərlidir.
Qadın və qızların hüquqlarının qorunması istiqamətində müəyyən addımlar atıldıqda cəmiyyətimizdə gender bərabərliyinin bərqərar olunmasına nail ola bilərik. Qadın və qızlar bütün sahələrdə irəli çəkilməli, onlara bərabər çıxışlar yaradılmalıdır. Hüquqlarını bilən, gücünə inanan qadın hər zaman ailədə, cəmiyyətdə özünü ifadə etməyi bacaracaq. O zaman zorakılığın müxtəlif formalarının aradan qaldırılması mümkün olacaq. Bu işdə hər birimiz fəal olmalı, səylərimizi birləşdirməliyik”, - deyə komitənin sədri diqqətə çatdırıb.
Birləşmiş Millətlər Təşkilatının Uşaq Fondunun (UNİSEF) Azərbaycandakı nümayəndəliyinin rəhbəri Edvard Karvardin, BMT-nin Əhali Fondunun Azərbaycan nümayəndəliyinin rəhbəri Fərid Babayev, Avropa İttifaqının ölkəmizdəki nümayəndəliyinin rəhbəri Kestutis Yankauskas, Avropa Şurasının Bakı Ofisinin rəhbəri Zoltan Hernyes təmsil etdikləri qurumların qadın və qızlara qarşı zorakılıqla mübarizədə gördükləri tədbirlərdən danışıb, Azərbaycanda bu istiqamətdə atılan addımları yüksək qiymətləndiriblər.
Daxili İşlər Nazirliyinin Baş İctimai Təhlükəsizlik İdarəsinin yetkinlik yaşına çatmayanlarla profilaktik işin təşkili şöbəsinin rəisi Adıgözəl Adıgözəlov, Sabunçu Rayon İcra Hakimiyyəti başçısının müavini Rəna Fərəcova, kulturoloq, Azərbaycan Respublikasının Prezidenti yanında Dövlət İdarəçilik Akademiyasının professoru, “Simurq” Azərbaycan Mədəniyyət Assosiasiyasının prezidenti Fuad Məmmədov, “Təmiz Dünya” Qadınlara Yardım İctimai Birliyinin sədri Mehriban Zeynalova, Konstitusiya Məhkəməsinin hakimi Ceyhun Qaracayev və digər çıxış edənlər qadın zorakılığının cəmiyyətə təsirindən danışıb, onun qarşısının alınması üçün beynəlxalq təcrübənin öyrənilməsinin, maarifləndirmə işlərinin aparılmasının və preventiv tədbirlərin görülməsinin vacibliyini qeyd ediblər.