Tahir Mirkişili: İyunun 15-i Azərbaycan tarixinə yeni dövrün başlanğıcı kimi düşüb
Bakı, 15 iyun, AZƏRTAC
Milli Qurtuluş Günü xalqımızın və dövlətimizin ictimai-siyasi həyatında ciddi dönüş yaradan tarixi hadisədir. Xalqımızın yaşadığı o ağrılı-acılı günlərdə həyatını riskə ataraq ictimaiyyətin israrlı təkidi ilə Bakıya gəlmək, idarəolunmaz vəziyyətə düşmüş dövlətin sükanı arxasına keçmək, qardaş qırğınının qarşısını almaq böyük cəsarət, siyasi səriştə tələb edirdi. Heç bir siyasi təcrübəsi olmayan başıpozuq bir qrupun yarıtmaz idarəçiliyi üzündən süquta uğramaq təhlükəsi ilə üzləşən dövlətimiz, itirilməkdə olan müstəqilliyimiz məhz Heydər Əliyevin böyük məharəti sayəsində qorunub saxlanıldı, möhkəmləndi. Ölkəmizin sayılıb-seçilən ziyalıları, ictimai-siyasi xadimləri Ulu Öndər Heydər Əliyevin ətrafında birləşərək müstəqil Azərbaycan dövlətinin məhv olmasına, parçalanmasına imkan vermədilər. Ümummilli Lider Heydər Əliyevin xilaskarlıq missiyası öyrənilməsi vacib olan tarixi prosesdir. Dahiliyin, vətənpərvərliyin, cəsarətin, siyasi səriştənin bütün vacib elementlərini özündə birləşdirən bu missiyanın hədəfi Azərbaycan dövləti və vətəndaşı idi.
Bu sözləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili söyləyib.
O bildirib ki, Ulu Öndər Heydər Əliyev hələ birinci hakimiyyəti dönəmində iqtisadiyyatın, mədəniyyətin, təhsilin və digər sahələrin bütün istiqamətlərində inkişafa çalışırdı. O, həyatı bahasına daim Azərbaycan xalqını, dövlətin milli maraqlarını müdafiə edib. Ümummilli Lider gözəl bilirdi ki, güclü dövlət, iqtisadi inkişaf, mədəniyyətimizin, idmanımızın dünyada tanıdılması güclü kadr potensialının yaradılmasından keçir. O, məktəblilərin, universitet tələbələrinin təhsilinə daim dəstək verib, xarici ölkələrdə oxumalarını təmin edib. Hələ sovet dövründə Moskvada Heydər Əliyevin siyasəti narahatlıq doğurur, ona o dövrdə mənfi xüsusiyyət kimi qəbul edilən millətçi damğası vurmağa çalışırdılar. Ulu Öndərin hələ sovet dövründə başlatdığı mübarizəni təəssüf ki, 1990-cı illərin əvvəllərində hakimiyyətə gələn qüvvələr davam etdirə bilmədilər. Heydər Əliyev ikinci dəfə Bakıya gələndə ilk işi ölkədəki xaosun, qardaş qırğınının, separatçılığın qarşısını almaq oldu. O, həyatını təhlükə altında qoyaraq dərhal Gəncəyə yollandı və orada baş qaldırmış qiyamın qarşısını aldı.
T.Mirkişili qeyd edib ki, Ümummilli Lider Heydər Əliyevin yürütdüyü siyasət ölkəmizin qüdrətini, nüfuzunu artırdı, Silahlı Qüvvələrimizi gücləndirdi. Milli Qurtuluş Günü Azərbaycan tarixinin ən şanlı səhifələrindəndir. Ulu Öndər Azərbaycan xalqına çox dəyərli miras qoyub. Bunlar güclü Azərbaycan dövləti, milli ruha bağlı xalq, vətənpərvər gənclik və heç şübhəsiz ki, peşəkar, qətiyyətli, güclü sərkərdə İlham Əliyevdir. Prezident İlham Əliyevin ölkəyə rəhbərlik etdiyi 2003-cü ildən bəri Azərbaycan sürətlə inkişaf edib. Bu gün Azərbaycan dünya miqyasında nüfuzlu ölkə kimi qəbul olunur. Cənubi Qafqaz regionunun lider dövləti olan ölkəmiz müasir beynəlxalq münasibətlər sistemində etibarlı tərəfdaşdır. Ulu Öndər Heydər Əliyevin müəyənləşdirdiyi siyasəti layiqincə həyata keçirən Prezident, Ali Baş Komandan İlham Əliyevin rəhbərliyi ilə müzəffər Ordumuz 30 ilə yaxın işğal altında qalmış torpaqlarımızı 44 günlük Vətən müharibəsində azad etdi, ərazi bütövlüyümüz bərpa olundu. Prezident İlham Əliyev bununla ata vəsiyyətini yerinə yetirdi. Bu gün üçrəngli Azərbaycan Bayrağı bütün rayonlarımızda dalğalanır. Əsası Ümummilli Lider tərəfindən əsası qoyulmuş siyasətin dövlətlərimizin başçısı tərəfindən uğurla davam etdirilməsi, güclü Azərbaycan dövlətinin formalaşdırılması, ölkəmizin ərazi bütövlüyünün və suverenliyinin bərpa edilməsi ilə nəticələndi”, - deyə deputat vurğulayıb.
Onun sözlərinə görə, Ulu Öndərin azərbaycançılıq ideologiyasının nəticəsidir ki, bu gün ölkəmizdə sülh və sabitlik hökm sürür, hər sahədə canlanma, inkişaf müşahidə olunur. Tam əminliklə söyləmək olar ki, xalqımız hər zaman 15 iyun Milli Qurtuluş Gününün tarixi və siyasi qiymətini verəcək.
Bölmənin digər xəbərləri
