Bakı, 15 iyun, AZƏRTAC

Milli müstəqilliyini 1991-ci ildə bərpa etmiş, lakin işğala, parçalanmaya, iqtisadi təlatümlərə, dövlət idarəçiliyində anarxiyaya məruz qalmış Azərbaycan xalqı bütün bunlardan azad olmağın yolunu böyük idarəçilik təcrübəsinə və liderlik qabiliyyətinə sahib Heydər Əliyevin yenidən hakimiyyətə qayıdışında görürdü. Xalqın təkidli çağırışı ilə 1993-cü il iyunun 15-də yenidən hakimiyyətə gəlməklə Heydər Əliyev milli qurtuluşun əsasını qoydu. Ümummilli Lider Heydər Əliyev hakimiyyətə qayıtmaqla o vaxtadək mövcud olan problemlərdən bizi qurtarmadı, həm də bugünkü uğurumuzun, qalibiyyətimizin əsasını qoydu. O, həyatının böyük hissəsində Azərbaycanın məsuliyyətini öz çiyinlərində daşıyıb, onu bir dövlət və xalqımızı bir millət kimi tarixin çətin sınaqlarından çıxarıb, müasir Azərbaycanı, onun həqiqətlərini, işıqlı sabahının etibarlı bünövrəsini yaradıb. Bu illər ərzində Azərbaycanın ictimai-siyasi, sosial-iqtisadi, elmi-mədəni, hərbi quruculuq və digər sahələrdəki dirçəlişi Ulu Öndərin adı ilə bağlıdır.

Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.

Politoloq bildirib ki, Azərbaycan xalqının iradəsi ilə ölkə rəhbərliyinə qayıdaraq müstəqil ölkəmizi, xalqımızı, milli-azadlıq hərəkatında qazanılmış tarixi nailiyyətləri məhv olmaqdan xilas etmək kimi çox çətin və şərəfli bir missiyanı öz üzərinə götürməsi Ümummilli Liderin özünün dediyi kimi, “ömrünün qalan hissəsini xalqına bağışlaması” idi.

Ulu Öndər Heydər Əliyevin müstəqillik dövründə həyata keçirdiyi siyasət XX əsrin 60-cı illərinin sonundan başlayaraq əsasını qoyduğu idarəetmə fəlsəfəsinin davamı idi. Həmin idarəetmə fəlsəfəsinin başlıca məqsədi və ideya-siyasi istiqaməti xalqın milli özünüifadəsinin bütün forma və vasitələrinin geniş vüsət alması, milli qürur hissinin gücləndirilməsi, milli şüurun yüksəlişinə təkan verən sürətli inkişaf strategiyasının müəyyənləşdirilərək həyata keçirilməsi idi. Ümummilli Lider tərəfindən təməli həmin dövrdə qoyulmuş azərbaycançılıq ideologiyası günümüzdə müasir Azərbaycanın dünyada yerinin müəyyən olunması, milli dövlətçiliyimizin formalaşması və dünya azərbaycanlılarının həmrəyliyi üçün möhkəm zəmin yaratmışdı.

"Ümummilli Lider Heydər Əliyevin yenidən hakimiyyətə gəlişi ilə müstəqilliyimiz inkişaf edərək məhz onun sayəsində əbədi və dönməz xarakter aldı. Ulu Öndərin 1969-1982-ci illərdə hakimiyyətdə olduğu zaman milli kadrların hazırlanması istiqamətində qətiyyətli addımlar atması, hər il yüzlərlə gənci hərbi və digər mühüm sahələrdə təhsil almaq üçün SSRİ-nin ən qabaqcıl ali məktəblərinə göndərməsi müstəqil Azərbaycanın kadr potensialının formalaşdırılmasında mühüm rol oynadı.

Totalitar sovet rejiminin hökm sürdüyü 1978-ci ildə Azərbaycan SSR-in Konstitusiyasının qəbulu və orada Azərbaycan dilinin dövlət dili kimi təsbit edilməsi Ümummilli Liderin müstəsna xidmətlərindəndir. Həmin zaman imperiya siyasətinin tələbləri ilə tam ziddiyyət təşkil edən xalqın mənəvi sərvətinin qorunub saxlanılması və inkişaf etdirilməsi üçün hüquqi əsasların yaradılması cəsarətli addım idi.

SSRİ rəhbərliyinin 1990-cı ildə Bakıya ordunun yeridilməsi haqqında qərarına və qanlı faciənin törədilməsinə ilk etirazı Heydər Əliyev bildirmişdi. Ulu Öndərin faciədən bir gün sonra Azərbaycanın Moskvadakı nümayəndəliyinə gedərək xalqımızın kədərinin bölüşməsi və sovet hakimiyyətinin ölkəmizdə həyata keçirdiyi qanlı aksiyanı ifşa etməsi o dövrdə xalqımıza bir dəstək, bir təsəlli oldu.

Ümummilli Liderin Naxçıvana rəhbərlik etdiyi 1991-1993-cü illərdə respublikamızın müstəqilliyi yolunda mühüm qərarlar verildi. Muxtar respublikanın adından “sovet sosialist” sözləri çıxarıldı, üçrəngli bayrağımız ilk dəfə Naxçıvanda Dövlət bayrağı kimi qəbul edildi, Dünya Azərbaycanlılarının Həmrəyliyi Günü qəbul olundu, 20 yanvar faciəsinə siyasi qiymət verildi və SSRİ-nin saxlanılması barədə referendumdan imtina edildi”,- deyə Y.Hacızadə vurğulayıb.

Politoloq qeyd edib ki, “Siyasət mümkün olanı etmək deyil, mümkünsüzü bacarmaqdır” kəlamındakı kimi, Heydər Əliyev Azərbaycanın qurulması, gələcək inkişafı üçün mümkünsüz görünən hər şeyi etdi. Fransız mütəfəkkiri Volterin “dövləti xilas etmək üçün bir dahi insan kifayətdir” sözləri də Ulu Öndərin timsalında özünü doğrultmuş oldu. Ona görə Heydər Əliyevin Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi əbədilik qazanması heç də təsadüfi deyil.

Diqqətə çatdırılın ki, Ümummilli Lider böyük azərbaycanlıdır. Onun azərbaycançılıq nəzəriyyəsi bu gün vahidliyimizi təmin edir. Ölkəmizdə bütün millətlərin, etnik qrupların sülh içində yaşamasını formalaşdırdı. Ulu Öndər Heydər Əliyevin vəsiyyəti Prezident, Müzəffər Ali Baş Komandan İlham Əliyev tərəfindən layiqincə, şərəflə, inkişaf etdirilməklə həyata keçirilir. Ümummilli Liderin vəsiyyəti Azərbaycan dövlətinin siyasi konsepsiyasının əsasını təşkil edir.

Ulu Öndərin təməlini qoyduğu Azərbaycan diplomatiyası, iqtisadiyyatı, hərb sahəsi bu gün inkişaf dövrünü yaşayır. Dünyanın gərgin, münaqişələrlə dolu dövrünü yaşadığımız bu günlərdə sabit ictimai-siyasi şərait, inkişaf edən iqtisadiyyat, güclü, ölkənin ərazi bütövlüyünü təmin edə bilən ordu dahi şəxsiyyətin əzminin, iradəsinin, uzaqgörənliyinin nəticələridir.

Çoxvektorlu, tarazlaşdırılmış və milli maraqlara əsaslanan xarici siyasət kursunun qanunauyğun nəticəsi kimi Azərbaycanın beynəlxalq mövqeyi gündən-günə möhkəmlənir. Cənubi Qafqazın lider dövləti olan ölkəmiz müasir beynəlxalq münasibətlər sistemində etibarlı tərəfdaş kimi tanınır. Dövlətimizin moderatorluğu və təşəbbüsü ilə strateji əhəmiyyətli layihələr reallaşdırılıb və bu siyasət davam edir. Azərbaycan Avropanın enerji təhlükəsizliyində mühüm rol oynayır, nəqliyyat–kommunikasiya xəritəsini yenidən formalaşdırır. Yəni, ölkəmiz regional və beynəlxalq təhlükəsizliyə, əməkdaşlığa çox mühüm töhfələr verir. Bir neçə il bundan əvvələ kimi öz təhlükəsizliyinin, ərazi bütövlüyünün təmin olunmasına çalışan Azərbaycan bu gün Cənubi Qafqazın, Mərkəzi Asiyanın, Avropanın hərbi, enerji və iqtisadi təhlükəsizliyinin təmin olunmasında mühüm rola malikdir.

“Əsası Ulu Öndər tərəfindən qoyulan və bu gün bizi bir çox ölkələrdən fərqləndirən ən mühüm və səciyyəvi keyfiyyətlərdən biri müstəqil siyasətin həyata keçirilməsidir. Azərbaycanın xarici siyasəti həm müstəqil xarakter daşıyır, həm də beynəlxalq hüquq normalarına və prinsiplərinə söykənir, ikitərəfli və çoxtərəfli münasibətlərin ruhuna – mahiyyətinə əsaslanır. Prezident İlham Əliyev çıxışlarında dəfələrlə bildirib ki, “biz güclü, qüdrətli dövlət qura bilmişik”. Bu gün Azərbaycan, sözün əsl mənasında, müstəqil siyasət aparan ölkədir. Bizim sözümüz imzamızdır. Bu gün dünya xəritəsində belə ölkələrin sayı o qədər də çox deyil. Xüsusilə biz ərazisi, əhalisi o qədər də böyük olmayan ölkələrə fikir versək, görərik ki, müstəqil siyasət aparmaq iqtidarında olan ölkələr o qədər də çox deyil. Biz tam müstəqil siyasət aparırıq. Bizim siyasət milli maraqlar üzərində qurulub. Azərbaycan xalqının maraqları bizim siyasətimizin mənbəyidir, onun əsasıdır. Kənardan siyasətimizə təsir etmə imkanları sıfıra bərabərdir. Bunu yaxın tarix göstərib. Bizim siyasət Azərbaycan xalqı tərəfindən dəstəklənir və müdafiə olunur. Xalq–iqtidar vəhdəti bizim uğurlarımızın əsas səbəbidir”, - deyə politoloq əlavə edib.