Şahin Bayramov: Anım Günü tarixi Zəfərimizin və milli dirçəlişimizin simvoludur
Xankəndi, 27 sentyabr, AZƏRTAC
27 Sentyabr – Anım Günü Azərbaycan xalqının müasir tarixində xüsusi mənəvi və ictimai əhəmiyyət daşıyan günlərdən biridir. Bu tarixdə Vətən uğrunda canından keçən qəhrəmanlarımızı yad etməklə yanaşı, tarixi Zəfərə gedən yolu, həmin qələbənin hansı böyük fədakarlıqlar hesabına əldə edildiyini bir daha xatırlayırıq.
Bu fikirlər Qarabağ Universitetinin rektoru Şahin Bayramovun 27 Sentyabr - Anım Günü ilə bağlı AZƏRTAC-a təqdim etdiyi yazıda yer alıb. Yazını təqdim edirik.
44 günlük Vətən müharibəsində Müzəffər Ali Baş Komandanımız İlham Əliyevin qətiyyətli və uzaqgörən rəhbərliyi ilə Azərbaycan Ordusunun nümayiş etdirdiyi yüksək döyüş hazırlığı, əsgər və zabitlərimizin misilsiz igidliyi, xalqımızın möhkəm birliyi və milli iradəsi nəticəsində ərazi bütövlüyümüz bərpa edildi. Bu tarixi Qələbənin hər səhifəsində Vətən qarşısında böyük fədakarlıq göstərmiş qəhrəman şəhidlərimizin izi var.
Bu gün həmin Qələbənin mahiyyətini yalnız tariximizin şanlı səhifəsi kimi deyil, həm də bizə böyük məsuliyyət yaradan müqəddəs əmanət kimi dərk etməliyik. Şəhidlərimizin həyatı və döyüş yolu Vətənə sədaqətin, milli iradənin və əsl vətəndaşlıq mövqeyinin parlaq nümunələrindəndir. Onların əziz xatirəsini yaşatmaq və göstərdikləri şücaətin mənasını gələcək nəsillərə çatdırmaq hər birimizin mənəvi borcudur.
Bu gün azad edilmiş ərazilərimizdə həyata keçirilən genişmiqyaslı quruculuq işlərini, yenidən salınan şəhər və kəndləri, yaradılan müasir infrastruktur və sosial obyektləri, insanların öz doğma yurdlarına qayıdışını böyük qürur hissi ilə müşahidə edirik. Qarabağda və Şərqi Zəngəzurda həyatın yenidən canlanması, bu torpaqların sürətlə inkişafı və tərəqqisi şanlı Zəfərin ən mühüm nəticələrindəndir. Əminik ki, uzun illər həsrətində qaldığımız bu doğma yurdlarımızın dirçəlişi uğrunda canlarından keçən qəhrəmanlarımızın ruhunu şad edən ən böyük mənzərələrdəndir.
Dövlət başçımızın müvafiq Sərəncamı ilə Xankəndi şəhərində Qarabağ Universitetinin yaradılması və fəaliyyət göstərməsi də bu böyük tarixi Qələbənin mühüm nəticələrindən biridir. Biz hər gün bu torpaqlarda təhsil alan gənclərimizlə birlikdə Zəfərin məsuliyyətini daha yaxından hiss edirik. Universitet olaraq qarşıya qoyduğumuz məqsəd yalnız yüksəkixtisaslı mütəxəssislər hazırlamaq deyil. Biz, eyni zamanda, milli-mənəvi dəyərlərini dərk edən, dövlətçiliyinə bağlı, Vətən qarşısında məsuliyyətini anlayan və cəmiyyətin gələcəyinə töhfə verməyə hazır gənclər yetişdirməyi əsas vəzifələrimizdən biri hesab edirik.
Şəhidlərimizin qəhrəmanlıq irsinin tələbələrimizə və bütövlükdə gənc nəslə çatdırılması bu missiyanın mühüm tərkib hissəsidir. Çünki tarixi yalnız bilmək kifayət deyil, onu yaradan dəyərləri yaşatmaq və gələcəyə ötürmək də vacibdir. Qarabağ Universitetində formalaşan hər bir gəncin öz xalqının keçdiyi mübarizə yolunu bilməsi, bu gün sahib olduğumuz azadlığın və imkanların qiymətini dərk etməsi bizim üçün xüsusi əhəmiyyət daşıyır.
27 Sentyabr – Anım Günündə Azərbaycanın ərazi bütövlüyü və suverenliyi uğrunda həyatını fəda etmiş bütün şəhidlərimizi dərin ehtiram və sonsuz minnətdarlıq hissi ilə yad edirik. Onların hər birinin qarşısında baş əyir, Uca Allahdan bütün şəhidlərimizə rəhmət diləyirik. Vətən uğrunda döyüşlərdə sağlamlığını itirmiş qazilərimizə möhkəm cansağlığı arzulayırıq.
Şəhidlərimizin müqəddəs xatirəsi daim yaşayacaq, onların göstərdiyi qəhrəmanlıq isə Azərbaycanın gələcək nəsilləri üçün Vətənə xidmətin əbədi örnəyi olaraq qalacaq.
Müxbir - Tahir Ağaməmmədov
Bölmənin digər xəbərləri
