Qahirə, 29 dekabr, AZƏRTAC

Rus əsilli iordaniyalı jurnalist Yelena Neduqina “Əl Ənbat” və “Cohina” nəşrlərində “Prezident İlham Əliyev mədəniyyətləri, sivilizasiyaları və dinləri birləşdirən liderdir” sərlövhəli məqalə ilə çıxış edib.

AZƏRTAC xəbər verir ki, məqalədə Prezident İlham Əliyevin dinlər, mədəniyyətlər və sivilizasiyalar arasında elmi və ardıcıl obyektiv diskussiyaları dəstəkləyən dünya liderlərindən biri olduğu qeyd edilib. İordaniyalı jurnalist vurğulayıb ki, 60 illik yubileyini qeyd edən Azərbaycanın dövlət başçısı istər öz ölkəsində, istərsə də onun hüdudlarından kənarda irqindən, dini mənsubiyyətindən asılı olmayaraq, bütün insanların dərin hörmətini qazanıb. Onun bu cür yüksək nüfuza malik olmasının səbəbi müxtəlif mədəniyyətlərə, adət-ənənələrə və dini etiqadlara qayğı və diqqətindən irəli gəlir. Azərbaycan Prezidenti məhz bu mövqedən çıxış edərək regionda sülhün, xalqların dinc yanaşı yaşamasının, tərəqqi və əməkdaşlığın rəmzi olan görkəmli siyasətçi imici qazanıb. O, eyni zamanda, öz ərazilərini Ermənistanın işğalından azad edən qalib sərkərdə kimi də böyük nüfuza malikdir.

Məqalədə diqqətə çatdırılıb ki, Prezident İlham Əliyev və birinci xanım Mehriban Əliyeva uzun illər və ardıcıl həyata keçirdikləri tədbirlər sayəsində bütün dünyada tolerantlıq, dinlərarası və mədəniyyətlərarası dialoqun carçıları kimi tanınırlar. Azərbaycanın dövlət başçısı İslam abidələri və məscidlərlə yanaşı, həm də xristian məbədlərinin də mühafizəsi və bərpasına xüsusi diqqət yetirir. Məhz onun qayğısı sayəsində qədim alban kilsələri, tarixi abidələri qorunub və bərpa edilib. Prezident İlham Əliyev 2018-ci ildə Bakıda keçirilən Qoşulmama Hərəkatının nazirlər səviyyəsində keçirilən konfransında birmənalı olaraq bəyan edib ki, mədəniyyətlərarası dialoqun inkişafı Azərbaycan dövləti üçün prioritet məsələdir.

Oqtay Bayramov

AZƏRTAC-ın xüsusi müxbiri

Qahirə