ELM VƏ TƏHSİL
Koreya Beynəlxalq Əməkdaşlıq Agentliyinin Azərbaycandakı nümayəndələri Təhsil Nazirliyində iki layihə barədə ətraflı məlumat vermişlər
Bakı, 28 fevral (AZƏRTAC). Fevralın 28-də Təhsil Nazirliyində Koreya Beynəlxalq Əməkdaşlıq Agentliyinin (KOICA) Azərbaycan ofisinin rezident nümayəndəsi Kim Eun-Sukun rəhbərlik etdiyi heyət ilə yeni görüş keçirilmişdir.
Nazirlikdən AZƏRTAC-a bildirmişlər ki, təhsil naziri Misir Mərdanov təhsil sisteminin müasir tələblər səviyyəsində inkişafına xidmət edən “Müəllimlərin distant əlavə təhsili” və “Azərbaycan təhsil sistemində elektron sənəd dövriyyəsi” layihələrinin maraq doğurduğunu bildirmişdir.
“Müəllimlərin distant əlavə təhsili” layihəsi üzrə ekspert Çoi Seon Mook təqdimat-məruzəsində layihə barədə ətraflı məlumat vermişdir. Çoi Seon Mook müəllimlərin iş yerlərindən ayrılmadan və xüsusi vaxt müəyyənləşdirmədən əlavə təhsilə cəlb olunmasına imkan verən layihənin həyata keçirilməsi mexanizminin üstün cəhətlərindən söz açmışdır. Qonaq layihə üzrə proqram və mövzuların Təhsil Nazirliyi tərəfindən hazırlanacağını nəzərə çarpdırmış, distant əlavə təhsil kurslarından keçən müəllimlərin müəyyən olunmuş mövzuları mənimsəmə səviyyəsinin elektron vasitələrdən istifadə edilməklə qiymətləndiriləcəyini bildirmişdir.
KOICA-nın Azərbaycan ofisinin rezident nümayəndəsi Kim Eun-Suk “Müəllimlərin distant əlavə təhsili” layihəsinin reallaşdırılması üçün qarşıda duran məsələlərdən bəhs etmişdir.
Kim Eun-Suk bildirmişdir ki, ilkin mərhələdə videodərslər hazırlanaraq müvafiq bazada yerləşdiriləcək və distant əlavə təhsil kurslarına cəlb olunan müəllimlər onlara verilmiş xüsusi icazə vasitəsilə bu vəsaitlərdən istifadə edə biləcəklər.
“Azərbaycan təhsil sistemində elektron sənəd dövriyyəsi” layihəsi üzrə ekspert Çul Yun Kim təqdimat-məruzəsində layihənin əhəmiyyəti barədə fikirlərini bildirmişdir. Qeyd etmişdir ki, layihə çərçivəsində Təhsil Nazirliyi, rayon (şəhər) təhsil şöbələri və nazirliyin digər qurumları arasında elektron sənəd dövriyyəsi sistemi yaradılacaqdır. Layihənin Təhsil Nazirliyinə elektron müraciət imkanlarını genişləndirəcəyini vurğulayan qonaq elektron sənəd dövriyyəsi zamanı elektron imzadan istifadə ediləcəyini söyləmişdir.
Misir Mərdanov KOICA-nın “Müəllimlərin distant əlavə təhsili” və “Azərbaycan təhsil sistemində elektron sənəd dövriyyəsi” layihələrinin həyata keçirilməsi istiqamətində gördüyü işləri yüksək dəyərləndirmiş və qeyd olunan sistemlərin yaradılmasının ölkəmizdə müasir təhsil sisteminin təşkilinə dəstək verəcəyini bildirmişdir. Eyni zamanda, layihələrin icrasının müəllimlərin peşəkarlıq səviyyəsinin artırılmasına, virtual öyrənmə mühitinin yaradılmasına, təlim və tədris resurslarına sərbəst girişin təmin edilməsinə, təhsil sistemində elektron idarəetmənin genişlənməsinə təkan verəcəyini nəzərə çarpdıran nazir bu işdə əməyi olan hər kəsə təşəkkürünü bildirmişdir.
Görüşdə layihələrin reallaşdırılması ilə bağlı maraq doğuran bir sıra məsələlər ətrafında müzakirələr aparılmış, müvafiq rəy və təkliflər səsləndirilmişdir.