Kiyev, 25 dekabr, AZƏRTAC

Ukraynanın Kiyev şəhərinin Taras Şevçenko adına Milli Muzeyində “Kyiv Diplomatic” jurnalının Azərbaycan Prezidenti İlham Əliyevin 60 illik yubileyinə həsr olunmuş xüsusi buraxılışının təqdimatı olub.

AZƏRTAC xəbər verir ki, layihə Azərbaycanın Ukraynadakı səfirliyi və “SOCAR Energy Ukraine” şirkətinin birgə təşəbbüsü və təşkilatçılığı ilə həyata keçirilib. Təqdimatda diplomatlar, hökumət rəsmiləri, ziyalılar və diaspor fəalları, soydaşlarımız iştirak ediblər. Jurnalın xüsusi buraxılışının üz hissəsində Prezident İlham Əliyevin söylədiyi ifadə və portreti yer alıb.

Azərbaycanın Ukraynadakı səfirliyinin üçüncü katibi Təranə Sadıqovanın moderatorluğu ilə keçirilən tədbirdə ilk öncə Azərbaycan Prezidentinin keçdiyi siyasi yol haqqında ətraflı məlumat verilib. Səfirliyin müvəqqəti işlər vəkili Kamal Xəlilov çıxış edərək bildirib ki, əsası ulu öndər Heydər Əliyev tərəfindən qoyulan müasir Azərbaycan dövləti layiqli davamçısı Prezident, Müzəffər Ali Baş Komandan İlham Əliyevin siyasi iradəsi nəticəsində güclənməkdədir.

“Prezident İlham Əliyev ümummilli lider Heydər Əliyevin ona vəsiyyət etdiyi hər şeyi başa çatdırdı. Əsaslı iqtisadi islahatlar apardı, döyüşə hazır güclü ordu yaratdı. Nəticədə dünyadakı bütün azərbaycanlıların əziz arzusunu reallaşdırdı - rəşadətli Azərbaycan Ordusunun gücü ilə işğal altında olan bütün torpaqları 44 gün ərzində azad etdi, ölkəmizin ərazi bütövlüyü tamamilə bərpa olundu. Bütün bunlar Azərbaycan Prezidentinin böyük siyasi istedadından və liderlik keyfiyyətlərindən irəli gəlir”, - deyə Kamal Xəlilov əlavə edib.

Ukrayna mədəniyyət nazirinin birinci müavini Rostislav Karandeev isə Azərbaycan dövlətinin və onun liderinin tək dünya azərbaycanlılarının yox, bir çox millətlərinin, o cümlədən Ukrayna ictimaiyyətinin də rəğbətinə səbəb olduğunu bildirərək, fikirlərini bölüşüb. O, öz torpaqlarına tam nəzarəti ələ keçirməyə və ölkənin ərazi bütövlüyünü bərpa etməyə nail olan Azərbaycan Prezidentini yubileyi münasibətilə təbrik edib.

Çıxış edən digər iştirakçılar Taras Şevçenko adına Milli Muzeyin Baş direktoru Dmitri Stus, Ukrayna Xarici İşlər Nazirliyinin departament direktorunun müavini Vladimir Boeçko, “SOCAR Energy Ukraine” şirkətinin icraçı direktor müavini Həzi Aslanov və digərləri Azərbaycanın işğal edilmiş ərazilərini ötən il 44 günlük Vətən müharibəsi ilə geri qaytarmasından, Müzəffər Ali Baş Komandan, Prezident İlham Əliyevin rəhbərliyi ilə ölkənin son bir ildə daha da artan beynəlxalq nüfuzundan danışıblar.

Sonda "Kyiv Dipolomatic" jurnalının Baş redaktoru Oleksandr Kondarenko Azərbaycan Prezidenti İlham Əliyevin böyüdülmüş fotoportretini səfirliyə təqdim edib.

Emil Hüseynli

AZƏRTAC-ın xüsusi müxbiri

Kiyev