LATVİYA KİNOREJİSSORUNUN UNİVERSAL KEYFİYYƏTİ
AZƏRTAC xəbər verir ki, iyunun 6-da “Azərbaycan” kinoteatrında “Şərq-Qərb” X Beynəlxalq Bakı kinofestivalı çərçivəsində latviyalı ssenariçi və rejissor Yuris Poşkusun “Yeknəsəqlik” filmi nümayiş etdirilmişdir.
“Yeknəsəqli”yin qəhrəmanları böyük şəhərlərdə yaşayan “kiçik” adamlardır. Filmin darıxdırıcı adına baxmayaraq, onların həyatını müşahidə etmək maraqlıdır. Bu insanların həyat enerjisi ilə dolu olması maraq doğurur. Baş qəhrəman İlze doğma kəndini tərk edərək, aktrisa olmaq ümidi ilə Riqaya gəlir. Sınaq imtahanından çıxa bilmədiyindən kəndə qayıtmağa utanır.
Sevgilisi qızı kəndə qaytarmaq üçün şəhərə gəlir. Filmdə hadisələr riyakarlıq edən, bir-birinə yalan danışan iki gəncin ətrafında cərəyan edir.
Filmdə Yeni Riqa Teatrının aktyorları İveta Pole, Varis Pinkis, Artuss Kayminş, Andis Strods, Madara Melberqa çəkilmişlər. Yuris Puşkusun sözlərinə görə, aktyorlar öz qəhrəmanlarını sözün əsl mənasında küçədə tapırdılar. Rejissorun tapşırığı belə idi. Sorğunun nəticələri göstərmişdir ki, rəyi soruşulanların 80 faizi həyatda rahatlıqdan savayı heç nə istəmir.
“Yeknəsəqlik” “Perspektivlər” 29-cu Moskva kinofestivalında və Anapada keçirilən “Kinoşok” festivalında “Ən yaxşı rejissor işinə görə” nominasiyası üzrə mükafatların sahibidir.
Bölmənin digər xəbərləri
