DÜNYA
Livanın mərhum Baş nazirini qətlə yetirənlərə hökm oxunub
Qahirə, 16 iyun, AZƏRTAC
BMT-nin dəstəklədiyi Haaqa məhkəməsində təsis edilmiş Livan hökumətinin başçısının qətli illə bağlı tribunal 2005-ci ildə bu ölkənin Baş naziri Rafik Haririni qətlə yetirənləri qiyabi olaraq ömürlük həbs cəzasına məhkum edib.
AZƏRTAC xəbər verir ki, məhkəməyə sədrlik edən hakim İvana Hrdliçkova Həsən Həbib Merhi və Hüseyn Həsən Oneissi haqqında hökmü oxuduqdan sonra deyib: "Bu ağır cinayət təkcə qurbanların yaxınlarını deyil, bütün Livan xalqını dəhşətə gətirib".
Bu ilin martında tribunalın apellyasiya palatası məhkumlar barəsində əvvəlki bəraət hökmünü ləğv edib və məhkum olunan şəxsləri terrorçuluqda və qətl törətməkdə təqsirli bilib. 2005-ci ildə baş verən partlayışda Livanın görkəmli siyasətçisi Hariri və daha 21 nəfər həlak olmuşdu. Bu cinayətlə əlaqədar BMT Təhlükəsizlik Şurasının 2007-ci il qətnaməsi ilə Haaqa məhkəməsində Livan tribunalı yaradılmışdı.
Oqtay Bayramov
AZƏRTAC-ın xüsusi müxbiri
Qahirə