LOS-ANCELESDƏ AZƏRBAYCAN XALQ CÜMHURİYYƏTİNİN 90 İLLİK YUBİLEYİ QEYD EDİLMİŞDİR
AZƏRTAC xəbər verir ki, Azərbaycanın Los-Ancelesdəki baş konsulluğu şəhərin tanınmış “Regency Club”unda Azərbaycan Xalq Cümhuriyyətinin 90-cı ildönümünə həsr olunmuş təntənəli ziyafət və böyük musiqi proqramı təşkil etmişdir. Qonaqları salamlayan baş konsul Elin Süleymanov Azərbaycan Demokratik Respublikasının tarixi əhəmiyyətindən danışmış, Xalq Cümhuriyyətinin Azərbaycan xalqına azadlıq, müstəqillik, dövlətçilik, tolerantlıq və milli şüur bəxş etdiyini bildirmişdir.
Mərasimdə Kaliforniya, Vaşinqton, Nevada, Yuta, Vayoming ştatları qubernatorlarının, Beverli Hills, Los-Anceles, Burbank, Ankorec, Long Biç, Örvayn şəhərləri merlərinin və Los-Anceles dairəsi başçılarının Azərbaycana ünvanladıqları təbrik proklamasiyaları oxunmuşdur. Çıxış edən Beverli Hills Şəhər Şurasının üzvü Cimmi Delşad Azərbaycana səfər etmək barədə danışmış və ölkəmizdəki tolerantlıq və qonaqpərvərlik ənənələrinə böyük ehtiramla yanaşdığını vurğulamışdır.
Los-Anceles şəhəri merinin protokol xidmətinin rəhbəri Elqa Şarp və Los-Anceles dairəsi başçılarının protokol xidmətinin rəhbəri Lurdes Saab isə öz çıxışlarında baş konsulluqla yanaşı, Azərbaycan icması ilə də hər zaman əməkdaşlıq etməyə hazır olduqlarını bildirmişlər.
Mərasimdə baş konsulluq adından Azərbaycan icması qarşısında xüsusi xidmətləri olan ABŞ Azərbaycanlıları Şəbəkəsinin (USAN) həmtəsisçisi Adil Bağırova və Azərbaycanın Dövlət himnini artıq ikinci ildir ki, ifa edən yunan Demetra Mustafaoğluna rəmzi mükafatlar təqdim edilmişdir. Müğənni D.Mustafaoğlu iyunun 27-də Bakıda planlaşdırılan konsert proqramı haqqında məlumat vermişdir.
Sonda Azərbaycan rəqs qrupu çıxış etmiş və məşhur Foks qardaşlarının ifasında Latın Amerikası musiqisi dinlənilmişdir.
300 nəfərdən çox qonağın qatıldığı bu ziyafətdə Los-Anceles və San-Fransisko konsulluqlarının nümayəndələri, Los-Anceles, San-Xose və Orange dairələrində fəaliyyət göstərən Azərbaycan icmalarının və Los-Anceles, San-Fransisko şəhərlərinin yəhudi, gürcü, türk və İran icmalarının nümayəndələri iştirak etmişlər.
######
Bölmənin digər xəbərləri
