Məntəqə seçki komissiyalarının sədr və üzvləri maarifləndirilir
Mingəçevir, 13 mart, Şahnəzər Bəşirov, AZƏRTAC
47 saylı Mingəçevir seçki dairəsi dairə seçki komissiyasında (DSK) məntəqə seçki komissiyalarının sədrləri və üzvləri üçün təşkil edilən maarifləndirici treninqlər davam edir.
AZƏRTAC-ın bölgə müxbiri xəbər verir ki, martın 13-də keçirilən treninqdə plana uyğun olaraq daha 6 məntəqə seçki komissiyasının sədrləri və üzvləri iştirak edib. 47 saylı Mingəçevir seçki dairəsi dairə seçki komissiyasının sədri Oqtay Məmmədov Mərkəzi Seçki Komissiyasının təlimatı və tövsiyəsi əsasında təşkil edilən treninqlərin əhəmiyyətindən danışıb. Məlumat verilib ki, dairə və məntəqə seçki komissiyaları üzvlərinin peşəkarlıq səviyyəsinin artırılması, seçkilər sahəsində onların bilik, bacarıq və vərdişlərinin daha da təkmilləşdirilməsi məqsədilə Mərkəzi Seçki Komissiyasının treninq qrupu tərəfindən yerlərdə keçirilən treninqlərin cədvəli, eləcə də seçki günü əsas seçki hərəkətləri ilə bağlı slaydlar hazırlanıb. İştirakçılar səsvermə günü seçki məntəqələrinin açılışına hazırlıqla, səsvermə saatlarında həyata keçiriləcək tədbirlərlə bağlı təqdimatlarla və slaydlarla izahlı şəkildə məlumatlandırılır. Həmçinin seçki günü əsas qanunamüvafiq seçki hərəkətləri, eləcə də qanunsuz hərəkətlərin qarşısının alınması barədə məlumat verilir.
Treninqdə 47 saylı Mingəçevir seçki dairəsi DSK-nın treninq qrupunun üzvü Ramiz İbrahimli çıxış edərək prezident seçkilərinə hazırlıq, seçkilərin keçirilməsi, səslərin hesablanması prosesi və səsvermənin nəticələrin rəsmiləşdirilməsi işində məntəqə seçki komissiyalarının üzvlərinin vəzifələri və fəaliyyətlərinin təşkili məsələlərindən, aşağı seçki komissiyaları tərəfindən seçki hüququnun qorunması mexanizmlərindən danışıb.
Tədbirdə seçici siyahıları ilə iş qaydasından və seçici siyahılarının dəqiqləşdirilməsindən də söz açılıb. Diqqətə çatdırılıb ki, 47 saylı Mingəçevir seçki dairəsi dairə seçki komissiyasında seçici siyahıları və bildirişlər artıq hazırdır. Seçicilərin hamısının adı seçici siyahısında öz əksini tapıb. Bildirişlərin qanunda nəzərdə tutulmuş vaxtda seçicilərə çatdırılması təmin olunacaq.
Çıxış edənlər prezident seçkilərinin tam demokratik şəraitdə keçirilməsi üçün komissiya üzvlərinin öz işlərinə məsuliyyətlə yanaşmasının önəmini qeyd ediblər. Bildirilib ki, səsvermə günü qanunvericiliyə əsasən səsvermə prosesi ilə bağlı məlumatların ictimaiyyətə çatdırılması üçün yerli və beynəlxalq müşahidəçilərin, KİV-lərin fəaliyyətinə hər cür şərait yaradılacaq. Seçki komissiyalarının üzvləri yerli və xarici müşahidəçilərlə, mətbuat işçiləri ilə təlimata uyğun işləməyin qaydalarını dəqiq öyrənməlidirlər.
Sonra trenerlər iştirakçıları maraqlandıran sualları cavablandırıblar. Treninqlər zamanı hər bir məntəqə seçki komissiyası üzvünə “Seçki günü üçün yaddaş” kitabçası, səsvermənin nəticələri haqqında protokol nümunəsi və bir sıra digər sənəd nümunələri təqdim edilir.
DKS sədri Oqtay Məmmədov AZƏRTAC-ın bölgə müxbirinə müsahibəsində qeyd edib ki, aprelin 11-də dairə üzrə keçiriləcək prezident seçkilərinə hazırlıq işləri uğurla aparılır. Məntəqələrdə seçkilərin şəffaf və demokratik keçirilməsi, komissiya üzvlərinin normal fəaliyyəti üçün lazımi şərait yaradılıb. 37 min 490 seçicisi olan dairə seçki komissiyasının ərazisində 30 daimi seçki məntəqəsi fəaliyyət göstərir. Seçicilərdən 408 nəfəri ilk dəfə səs verəcək gənclər, 493 nəfəri yaşı 80-dən yuxarı olan insanlardır. Məntəqələr lazımi texniki avadanlıqla və məlumat kitabçaları ilə tam təchiz edilib.
Aşağı seçki komissiyaları üçün treninqlər martın 12-dən 14-dək 47 saylı Mingəçevir seçki dairəsi üzrə 30 məntəqə seçki komissiyasının sədri və 150 üzvü üçün müvafiq qaydada davam edəcək. Martın 14-də daha 12 məntəqə seçki komissiyasının nümayəndələri treninqlərə cəlb olunacaq.
Qeyd edək ki, treninqlər Azərbaycan Respublikası Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” əsasında təşkil olunur.
Bölmənin digər xəbərləri
