MİLLİ MƏCLİSİN SƏDRİ İİR XARİCİ İŞLƏR NAZİRİNİN MÜAVİNİ İLƏ GÖRÜŞMÜŞDÜR
AZƏRTAC xəbər verir ki, Milli Məclisin sədri Oqtay Əsədov iyunun 5-də ölkəmizdə səfərdə olan İran İslam Respublikası (İİR) xarici işlər nazirinin müavini Əlirza Şeyx Əttar ilə görüşmüşdür.
Milli Məclisin sədri demişdir ki, Azərbaycan ilə İran dost ölkələrdir, xalqlarımızı tarixi, dini və mədəni əlaqələr bağlayır. İran Azərbaycanın müstəqilliyini tanıyan ilk dövlətlərdəndir. Azərbaycan yaxın qonşusu İran ilə münasibətlərin inkişafına böyük əhəmiyyət verir. Dövlətlərimizin başçılarının qarşılıqlı səfərləri və bu səfərlər zamanı imzalanmış sənədlər ikitərəfli əlaqələrimizin inkişafına böyük təkan verir.
İİR-lə iqtisadi əlaqələrdən söz açan Milli Məclisin sədri, ötən il qarşılıqlı ticarət dövriyyəsinin həcminin 483 milyon ABŞ dolları məbləğində olduğunu diqqətə çatdırmışdır.
Azərbaycana səfərindən məmnunluğunu bildirən Əlirza Şeyx Əttar qeyd etmişdir ki, onun ölkəsi də Azərbaycan ilə əlaqələrin inkişafında maraqlıdır.
Tərəflər parlamentlərarası əlaqələri genişləndirməyin, hər iki ölkənin parlamentindəki dostluq qruplarının qarşılıqlı səfərlərinin əhəmiyyətini vurğulamışlar.
Bölmənin digər xəbərləri
