Kişineu, 25 dekabr, AZƏRTAC

Moldovanın bir sıra aparıcı informasiya portallarında Azərbaycan Prezidenti İlham Əliyevin fəaliyyəti barədə məqalə dərc olunub.

Ölkəmizin Moldovadakı səfiri Qüdsi Osmanovun müəllifi olduğu məqalədə vurğulanır ki, bu gün Azərbaycan Prezident İlham Əliyevin liderlik keyfiyyətləri, parlaq zəkası sayəsində iqtisadi, siyasi, diplomatik və hərbi sahələrdə güclü dövlət qurumları olan qüdrətli ölkəyə çevrilib. Prezident İlham Əliyev Azərbaycan xalqının ümummilli lideri Heydər Əliyevin siyasi kursunun layiqli davamçısı kimi ölkəni gücləndirib, inkişaf etdirib.

“Ən vacib məsələ isə indi baş verdi. Prezident İlham Əliyev Azərbaycan xalqına qürur, şərəf, ləyaqət və doğma torpaqlarını qaytardı. Ali Baş Komandan 44 gün ərzində işğalçıları qovdu və Qarabağ uğrunda Vətən müharibəsində qalib gəldi, Azərbaycanın ərazi bütövlüyünü bərpa etdi, məcburi köçkünlərin doğma yurdlarına qayıtmaq arzusunu gerçəkləşdirdi. Prezident İlham Əliyevin rəhbərliyi ilə Azərbaycan təkcə döyüş meydanında deyil, həm də siyasi müstəvidə və informasiya məkanında inamlı qələbə qazandı və bu gün ölkəmiz öz şanlı tarixində möhtəşəm bir dövr yaşayır”, - deyə Qüdsü Osmanov məqaləsində yazır.

Məqalədə daha sonra qeyd edilir: “Maraqlıdır ki, postsovet ölkələri tarixində bəlkə də az sayda şəxslərdən biri olaraq İlham Əliyev üçüncü tərəf kimi ədalətli hakim rolunda, bir sərkərdə kimi hakimiyyətdən üstün olmağı bacardı. Prezident İlham Əliyev həmişə iki zəruri dəyərdən danışır: ədalət və ləyaqət. Azərbaycanda ədalətli və xalqa yaxın Prezidenti həmişə seviblər və sevirlər. Başlıcası odur ki, Prezidentə, onun qərarlarına etibar edirlər. Buna görə hərbi qulluqçularla yanaşı, vətəndaşlar könüllü və səfərbərliklə sonadək və tərəddüd etmədən Qarabağı qorumağa getdilər, çünki liderinə və böyük bir qələbəyə əmin idilər. Xalq bu müharibəni 44 günlük Vətən müharibəsi və dəmir yumruğun qələbəsi adlandırır. O səbəbdən ki, güclü iradəli əsgərlər öz Ali Baş Komandanlarının dəmir yumruğu ətrafına birləşərək, cəsarətləri və vətənpərvərlikləri ilə qalib gəldilər, işğalçıları öz torpaqlarından qovdular”.

Səfir vurğulayır ki, milli maraqları qorumaq siyasəti ilə təcrübəli və uzaqgörən dövlət xadimi - Azərbaycanın lideri bütün dünyadakı soydaşlarının sevgisinə və hörmətinə haqlı olaraq layiqdir, çünki onun hər qərarının arxasında Vətənə və xalqa xidmət etmək kimi səmimi istək var. İnsanlar Azərbaycanın hərtərəfli inkişafını, öz rifahlarını və təhlükəsizliyini, övladları üçün etibarlı, parlaq gələcəyini məhz onunla bağlayırlar.

Hərbi sahədə böyük uğurlarla yanaşı, Azərbaycanın lideri ölkə iqtisadiyyatını da güclü inkişaf etdirib, sosial sahədə böyük işlər görülüb. Bu sahələrdə bir çox layihələr həyata keçirilib ki, bu da Azərbaycanı bu gün Qafqazda ən yüksək alıcılıq qabiliyyətinə malik ölkəyə çevirib. Dövlət, eyni zamanda, ən sabit pensiya sisteminə malikdir. Ümumiyyətlə, Prezident İlham Əliyev vətəndaşların ən çox ehtiyac duyduğu maliyyə sabitliyini təmin edib.

Emil Hüseynli

AZƏRTAC-ın xüsusi müxbiri

Kiyev