Qax, 22 noyabr, Mustafa Dadaşov, AZƏRTAC

Yeni Azərbaycan Partiyası (YAP) Azərbaycan tarixinin son dərəcə ağır və çətin, ölkənin ciddi sınaqlara məruz qaldığı bir zamanda yaradılıb. Burulğanlı, keşməkeşli bir dövrdə ictimai-siyasi meydana gəlmək və ölkənin müqəddəratında rol oynamaq, tənəzzüldən tərəqqiyə doğru inamla irəliləmək, əlbəttə ki, çətin və şərəfli bir məramın reallaşması deməkdir. 30 il bundan əvvəl yaradılan və xalqımızın Ümummilli Lideri Heydər Əliyevin azərbaycançılıq məfkurəsinə və milli inkişaf konsepsiyasına sədaqət ruhunda fəaliyyət göstərən YAP müstəqil dövlətimizin qurulması və möhkəmlənməsinə, ölkəmizdə sosial-iqtisadi inkişafın təmin olunmasına yönələn misilsiz xidmətlərlə zəngin olan yol keçib.

Bu fikirləri AZƏRTAC-ın bölgə müxbirinə açıqlamasında Yeni Azərbaycan Partiyasının yaradılmasının 30 illiyi münasibətilə Bakı şəhərində Heydər Əliyev Mərkəzində keçirilən yubiley tədbirinin iştirakçısı, YAP Qax rayon təşkilatının sədri Natiq Allahverdiyev söyləyib.

Müsahibimiz deyib: “1991-ci ilin 18 oktyabrında Azərbaycanda dövlət müstəqilliyi rəsmən elan olunduqdan sonra ölkəmiz bu müstəqilliyi itirmək, hətta bir dövlət kimi dünyanın siyasi xəritəsindən silinmək təhlükəsi ilə üz-üzə qalmışdı. O vaxtkı iqtidarın səriştəsiz siyasəti, dövlətə, xalqa qarşı edilən xəyanətlər, ölkəni bürümüş dərin siyasi, iqtisadi, sosial böhran ziyalıları, tanınmış insanları son dərəcə narahat edirdi. Belə bir zamanda Azərbaycanın taleyini düşünən insanlar ölkəni böhrandan çıxara biləcək yeni bir partiya yaratmaq təşəbbüsü ilə çıxış etdilər və bu məqsədlə Ulu Öndər Heydər Əliyevin şəxsiyyəti ətrafında birləşdilər. Məhz belə bir vaxtda 91 nəfər Azərbaycan ziyalısının imzası ilə Naxçıvana, Heydər Əliyevə müraciət göndərildi. Azərbaycanın ən yeni tarixinə "91-lər"in müraciəti kimi daxil olmuş həmin sənəd əslində, bütün xalqın arzu və istəklərinin ifadəsi idi”.

Təşkilat sədri qeyd edib ki, 1992-ci il noyabrın 21-də Azərbaycan xalqının Ümummilli Lideri Heydər Əliyevin sədrliyi və tanınmış ziyalıların iştirakı ilə Naxçıvan şəhərində YAP-ın təsis konfransının keçirilməsi o zaman müstəqilliyini yeni bərpa etmiş ölkəmizin bu müstəqilliyi itirmək təhlükəsindən xilas olmasına aparan yolun başlanğıcı olub. Hər hansı siyasi partiyanın yarandığı vaxtdan keçən qısa müddət ərzində hakimiyyətə gəlməsi tarixdə çox nadir hallarda rast olunsa da, YAP cəmi altı ay sonra hakimiyyətə gəlib və iqtidar partiyasına çevrilib.

Natiq Allahverdiyev deyib: “30 illik tarixi yolda Ümummilli Lider Heydər Əliyevin yaradıcısı olduğu YAP ölkəmizin ictimai-siyasi həyatında əhəmiyyətli rol oynayır. Müasir dövrdə beynəlxalq arenada tanınan və qəbul edilən nüfuzlu partiyalar sırasında olması onun yaradıcısı Ulu Öndərin uzaqgörən, müdrik siyasəti ilə bağlıdır. Daxili və xarici siyasət strategiyasının aydın konturları YAP-ın cəmiyyətin mütləq əksəriyyətinin inamını qazanmasında müstəsna rol oynayır”.

Müsahibimiz qeyd edib ki, bu gün Ulu Öndər Heydər Əliyevin siyasətini uğurla davam etdirən Azərbaycan Prezidenti İlham Əliyevin sədri olduğu YAP-ın nüfuzu getdikcə daha da artmaqdadır. Heydər Əliyev ideyalarına sadiq olan və bu ideyalar əsasında fəaliyyət göstərən iqtidar partiyası Prezident İlham Əliyevin sədrliyi ilə böyük inkişaf yolu keçib. Bu gün YAP xalqımızın milli maraqlarını ifadə edən vahid və avanqard siyasi qüvvəyə çevrilib. Azərbaycan Prezidenti, Yeni Azərbaycan Partiyasının Sədri İlham Əliyevin qətiyyətli siyasəti nəticəsində ölkəmiz hər bir sahədə böyük inkişaf yolu qət edib. Bu gün müasir Azərbaycanda nəhəng enerji layihələri reallaşdırılır, ölkənin dünyada tanınmasına və milli maraqlara xidmət edən çoxsaylı tədbirlər keçirilir. YAP bu gün də müstəqilliyimizin, demokratik, hüquqi, dünyəvi dövlətimizin möhkəmləndirilməsi, dayanıqlı sosial-iqtisadi inkişafın təmin olunması proseslərində yaxından iştirak edir və bu, partiyaya ümumxalq inam və etimadının daim artması ilə müşahidə olunur.

YAP rayon təşkilatının sədri deyib: “2003-cü ildən etibarən Azərbaycan Prezidenti İlham Əliyevin uğurlu daxili və xarici siyasəti, məqsədyönlü islahatlar proqramı ölkəmizin bütün sahələrdə yeni nailiyyətlərlə müşahidə olunan sürətli inkişaf mərhələsinə qədəm qoymasına səbəb olub. Əlbəttə ki, YAP-ın fəaliyyət mexanizminin əsaslarını təşkil edən mühüm prinsiplərdən biri güclü dövlət anlayışıdır. Bu güclü dövlət anlayışı isə həm dövlətin iqtisadi qüdrətinin artırılmasını, həm də vətəndaşların sosial rifah halının yaxşılaşdırılmasını özündə ehtiva edir. Güclü iqtisadiyyatı, dinamik inkişafı, ordu quruculuğu sahəsində əldə olunan nailiyyətlər qısa bir zamanda Azərbaycanın şanlı Qələbəsi ilə başa çatdı. 44 günlük Vətən müharibəsində xalqımızın milli mübarizə ruhu, sarsılmaz həmrəyliyi, dövlətimizin gücü 30 ilə yaxın işğal altında olan torpaqlarımızın azad olunması ilə nəticələndi. Xalqımız Müzəffər Ali Baş Komandan İlham Əliyevin ətrafında yumruq kimi birləşdi. Dövlətimizin başçısı sərkərdəlik məharəti nümayiş etdirərək Qarabağın xilaskarı kimi adını tarixə həkk etdi. Bu Zəfərlə həm tarixi ədalətin, həm də beynəlxalq hüququn bərpasına müvəffəq olduq və dövlətimizin gücü bir daha dünyaya bəyan edildi. Zəfər tariximiz həm də ata vəsiyyətinin reallaşdırılması tarixidir. Bunu hər bir azərbaycanlı böyük qürur hissi ilə qeyd edir. Prezidentimiz, Müzəffər Ali Baş Komandan “Şuşasız Qarabağ, Qarabağsız Azərbaycan yoxdur”, “Biz hökmən Qarabağa qayıdacağıq!” deyərək, Ulu Öndərin böyük arzularını böyük iradə, siyasi və hərbi ustalıqla reallaşdırdı. Hər bir Azərbaycan vətəndaşı qürur hissi keçirir və fəxr edir ki, bu gün Qarabağımızda üçrəngli bayrağımız dalğalanır. Qarabağ, Şərqi Zəngəzur yenidən qurulur, gözəlləşir və hər kəs əmindir ki, Prezident İlham Əliyevin rəhbərliyi ilə bu işlər daha geniş vüsət alacaq”.